کابل ښار (پژواک ٤ ليندۍ ٩١): ولسمشر حامد کرزي نن له غرمې مخکې د عاشورا په مراسمو کې د کابل ښار د قهرمان کربلا په جامع جومات کې ګډون وکړ.
د اسلام د ستر پيغمبر حضرت محمد (صلى الله عليه و سلم) لمسى امام حسين او ٧٢ ياران يې پر همدې ورځ (د ٦١ هجري قمري کال د محرم الحرام په لسمه) د عراق په کربلا دښته کې د وخت د حاکم، يزيد له خوا په ډېرې بې رحمۍ شهيدان شول.
د محرم الحرام لسمه (عاشورا) د اسلام د ستر پيغمبر د لمسي او يارانو روح ته د دعا په موخه هر کال د هيواد په مرکز اولايتونو کې لمانځل کېږي.
اهل تشيع مسلمانان دغه ورځ د وير په مراسمو لمانځي، چې تورې جامې يې اغوستې وي او همداراز ځانونه په زنځيرونو او چړو وهي، چې ان پر بدن يې وينې راماتيږي.
د ولسمشرۍ ماڼۍ له مطبوعاتي دفتر څخه د ليندۍ په ٤ مه پژواک اژانس ته په رالېږل شوې خبرپاڼه کې راغلي، چې په دې مراسمو کې د ولسمشر هغه ماشومان، چې د کربلا د شهیدانو د عزادارۍ په مراسمو کې د ګډون لپاره راغلي وو، ونازول او په ټول هيواد کې یې د ملي يووالي، سولې او امنیت د ټینګښت لپاره دعا وکړه.
د يادونې ده، چې په هېواد کې د عاشورا مراسم په امنیت او ارامۍ کې ترسره شول او خلکو د مرکز او ولایاتو په جوماتونو او تکیه خانو کې د حسیني شورا د یاد او خاطرې لمانځنه وکړه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن