محمودراقي ( پژواک ٢٨مرغومى ٩١): دکاپيسا ولايت د نجراب ولسوالۍ د جنايي جرمونو پر وړاندې د مبارزې امر ووژل شو او دوه پوليس ټپيان شول.
د نجراب ولسوال عبدالودود حيدري پژواک خبري اژانس ته وويل، چې وړمه شپه ددې ولسوالۍ د جنايي جرمونو پر وړاندې د مبارزې امر عبدالعليم حيدري له يو شمير نورو پوليسو سره د نجراب د افغانيه درې د دليخېلو کلي ته د ملانادر د نيولو لپاره ولاړ.
د ده په وينا، ملا نادر په وژنو او وسلوالو غلاوو کې لاس لري.
ولسوال وايي، چې ملانادر له خپل کور څخه پر پوليسو ډزې وکړې ، چې په پايله کې يې عبدالعليم حيدري ووژل شو او دوه پوليس ټپيان شول .
سرچينه زياتوي، چې امنيتي ځواکونو تر پېښې وروسته په سيمه کې عمليات پيل کړي، خو ملانادر لادرکه شوى او تر اوسه نه دى نيول شوى .
د طالبانو وياند ذبيح الله مجاهد وايي، چې وړمه شپه په ياده سيمه کې پوليسو د دوى پر کسانو چاپه ووهله، چې په پايله کې يې د نجراب د جنايي جرمونو پر وړاندې د مبارزې امر او يو بل پوليس ووژل شو .
دى وايي، چې په ياده يو ساعته نښته کې يو شمير پوليس ټپيان شوي هم دي او د دوى کسان دجګړې له سيمې په خوندي توګه وتلي دي.
