مزار شريف (پژواک ٢٨ مرغومى ٩١ ) : د بلخ ولايت په مزار شريف ښار کې ديوه لوى سوداګريز مارکېټ دسوځېدو مخه ونيول شوه.
د حاجي جوزجاني په نامه دغه مارکېټ د مزار شريف د روضې زيارت شمال لور ته په ١٠٠ مترۍ کې موقعيت لري.
د بلخ د امنيه قوماندانۍ دامنيت امر سمونوال عبدالرزاق قادري د پېښې په ځاى کې پژواک اژانس ته وويل، چې ددغه مارکېټ د دويم پوړ په يوه دوکان کې نن سهار په لسو بجو اور لګېدلى و.
هغه زياته کړه، چې د اطفايې لخوا په بېړنۍ توګه او سختو هلو ځلو دغه اور په وخت مړ شو او د نورخورېدو مخه يې ونيول شوه.
دا چې اور ولې لګېدلى و او څومره زيان اوښتى، قادري وويل ،چې دا له وخته مخکې ده او تر څيړنو وروسته به معلومه شي.
ددغه مارکېټ ددويم پوړ يوه دوکاندار مطيع الله پژواک اژانس ته وويل ، په کوم دوکان کې چې اور لګېدلى و، هغه نن بند و.
د نوموړي په وينا، دا دسيمسارۍ دوکان دى او داټکل له مخې پکې د پنځوس زرو افغانيو په ارزښت توکي سوځيدلي دي.
د مطيع الله په وينا، اور په وخت مړ کړاى شو، يواځې په خوا کې يې يو بل دوکان لږ زيانمن شوى او د نورې اور لګېدنې مخه ونيول شوه.
ديادونې ده، چې درې کاله مخکې همدغه مارکېټ اور اخيستى و، چې له امله يې خلکو ته ميليونونه ډالر زيان اوښتى و.
