د دغه وزارت مالي مرستيال احمدشاه وحيد نن په کابل کې خبريالانو ته وويل، چې سختو واورو د غور، باميان او دايکنډي ولايتونو ټولې لارې تړلې دي.
خو هغه وويل، د سيمې خلک به ځکه له ستونزو سره مخ نه شي، چې د دغو ولايتونو لارې به تر دوو يا درېيو ورځو ډېرې بندې پاتې نه شي.
د هغه په وينا، که څه هم دغه وزارت د واورو پاکولو پوره تجهيزات په واک کې لري، خو د سختې واورې او توپان له امله دغه چاره ځنډېدلې ده.
دا په داسې حال کې ده، چې د باميان او ميدان وردګو ولايتونو چارواکي د لارو بندېدو په منلو سره پژواک خبري اژانس ته ويلي، چې د ميدان وردګو په موشکي کوتل او د باميان او دايکنډي په قوناق او شاتو کوتلونو کې، چې تېره ورځ له ١٣٠ څخه زيات مسافر په واورو کې ګېر پاتې و، د شپې تر را رسېدو مخکې د دوى په هڅو او د خلکو په مرسته ژغورل شوي دي.
له بلې خوا د افغانستان شمال ته غځېدلې لويه لاره د سالنګ په برخه کې له تېرو دوو ورځو راهيسې د ترافيکو پر مخ تړلې ده.
د فوايد عامې وزارت مالي مرستيال وويل، چې په سالنګونو کې د سختې واورې او توپان له امله څه په سترګو نه ښکاري، د هوا درجه منفي ٢٥ ته راټيټه شوې او په شمالي سالنګ کې د واورې کچه درې مترو ته رسېږي.
دى وايي: ((که سبا واوره يا توپان نه وي، نو د يوې ورځې په اوږدو کې به دغه لاره د ترافيکو پر مخ پرانيستل شي.))
د سالنګونو لويه لار، چې په غرونو کې له اوږده تونل څخه تېريږي، د هېواد مرکز له نهو شمالي ولايتونو سره نښلوي، د واورو او توپان له امله تېره جمعه د ترافيکو پر مخ تړل شوې ده.
د فوايد عامې وزارت مرستيال وويل، چې په جنوبي او شمالي سالنګ کې سختې واورې ښويېدلې دي.
د ده په خبره، سږ کال دغه وزارت له دې لارې د تلونکو مسافرو د خونديتوب لپاره له خپلو ټولو امکاناتو کار اخيستى دى.
وحيد وويل، چې له همدې امله سږ کال د لويو لارو په اوږدو کې د واورې د اورېدو او ښويېدو له امله چا ته مرګ ژوبله نه ده اوښتې.
نوموړي څرګنده کړه، چې په سالنګونو کې د برفکوچونو د مخنيوي لپاره دغه وزارت د توپونو له فير نه په ګټه اخيستو، مصنوعي برف کوچونه رامنځته کوي، ترڅو له لارې تېرېدونکي وسايط او مسافرين په خوندي ډول تګ راتګ وکړي.
د ويلو ده، چې د ١٣٨٨ کال د سلواغې په مياشت کې په سالنګ کې د واورو ښوويېدو له امله لسګونه مسافرين مړه او ټپيان شوي وو، خو تر هغې وروسته د فوايد عامې وزارت د ژمي په موسم کې د مرګ ژوبلې د مخنيوي لپاره کلک احتياطي ګامونه پورته کړي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن