کابل(پژواک١٧سلواغه٩١): د افغانستان او پاکستان ولسمشرانو هيله څرګنده کړه،چې د افغانستان، پاکستان او د نړي د يوشمير اسلامي هيوادونو د ديني عالمانو ګډه غونډه به د روان کال په مارچ کې په کابل کې جوړه شي. د افغانستان د بهرنيو چارو وزارت په خبرپاڼه کې راغلي ، چې يادو ولسمشرانو دغه هيله د افغانستان، پاکستان او برېتانيا هېوادونو د مشرانو په غونډه کې چې تېره ورځ په لندن کې جوړه شوه ، څرګنده کړه .
سرچينه وايي، چې په دغه کنفرانس کې به د ګاونډيو هيوادونو پر ديني عالمانو سربيره د نړۍ د يوشمير اسلامي هيوادونو مشهور عالمان هم ګډون وکړي.
د دغې غونډې وړانديز درې مياشتې مخکې شوى و او په پام کې وه، چې دې غونډه کې د دواړو هېوادونو ديني پوهان د افغانستان جګړه او ځانمرګي بريدونه د اسلامي حکومونو په رڼا کې وڅېړي.
ټاکل شوه وه، چې دغه غونډه د تېرې مياشتې (جنورۍ) په اوږدو کې جوړه شي ، خو د نا څرګندو دلايلو له مخې ځنډېدلې ده .
د يادولو ده، چې تيره ورځ د افغانستان دسولې د عالي شورا يوتن غړي محمد اسماعيل قاسميارپژواک ته ويلى و ،چې د افغانستان د سولې عالي شورا پلاوى به په نږدې راتلونکي کې د يادې غونډې په اړه اسلام اباد ته سفر وکړي، ترڅو د يادې غونډې پر اجنډا، د غړو د نومونو پر نوملړ او د جوړېدو پر نېټې يې بحث وکړي.
