جلال اباد(پژواک، ٢١سلواغه ٩١): ناپېژاندو وسلوالو په خوګياڼيو ولسوالى کې درې تنه په ډزو وژلي دي.
د خوګياڼو ولسوال سيدرحمان مومند د سلواغې په ٢١مه، پژواک خبري اژانس ته وويل، نن مازيګر څلور بجې د خوګياڼو د ادوړ په کرکڼۍ سيمه کې درې تنه، چې په موټر کې سپاره وو، د ناپېژاندو وسلوالو له لوري وژل شوي دي.
ده زياته کړه: “درې واړه عام وګړي دي چې هر يو يې بسم الله، محمدالله او خالد نومېږي.”
ولسوال وايي، له پېښې څخه څو شېبې وروسته دوى رسېدلي، خو کوم کس يې د پېښې په تور نه دى نيولى.
د خوګياڼو د روغتون امر ډاکټر نوراغا پژواک خبري اژانس ته وويل، چې درې جسدونه روغتون ته وروړل شوي دي.
دى زياتوي چې دا جسدونه په ډزو لګېدلي او ټول عام وګړي دي.
د سيمې اوسېدونکى فهيم وايي، ياد کسان په موټر کې سپاره وو، چې ناپېژاندو وسلوالو پرې ډزې وکړې.
دى زياتوي: “موږ چې راغلو، نو دوى يې په ډزو ويشتي وو او موټر هم سورى سورى و.”
د ده په خبره، وسلوال کسان له بريد سره سم په تېښته بريالي شوي دي.
ياده دې وي چې څه موده وړاندې په خوګياڼو کې يو ډاکټر د ناپېژاندو وسلوالو له لوري تښتول شوى و، چې نن د ننګرهار د مرستيال والي حنيف ګرديوال له لوري خپلې کورنۍ ته وروسپارل شو.
