هرات ښار (پژواک ٢٢ سلواغه ٩١): د هرات ولايت پوليسو په سرحدي ښار ګوټي اسلام کلا کې دوه افغانان ايران ته د نشه يي توکو د قاچاق په تور نيولي دي.
د هرات د امنيه قوماندانۍ وياند سمونوال نورخان نېکزاد د سلواغې په ٢٢مه پژواک خبري اژانس ته وويل، چې ياد کسان تېره ورځ د ٢٧ کيلوګرامه ترياکو د قاچاق پر مهال لاس په لاس نيول شوي دي.
نېکزاد زياته کړه، چې نيول شوي کسان د هرات د کهسان ولسوالۍ اوسېدونکي دي او ياد نشه يي توکي يې په يوه ټېلر موټر کې لېږدول.
د هغه په وينا، دغه کسان له نشه يي توکو سره يو ځاى د ترهګرۍ پر ضد د مبارزې پوليسو له خوا د اسلام کلا سرحدي ښارګوټي د تلاشۍ په پوسته کې ونيول شول.
د امنيه قوماندانۍ وياند وايي، چې نيول شوي کسان عدلي او قضايي ارګانونو ته سپارل شوي دي.
د هرات د امنيه قوماندانۍ د معلوماتو له مخې، د روان لمريز کال له پيل راهيسې په بېلابېلو سيمو کې پنځه ټنه نشه يي توکي له درې نيم سوه تورنو کسانو سره نيول شوي، چې نهه تنه يې ايرانيان دي.
