چاريکار (پژواک ٩ کب ٩١): تېره شپه د واورې ښوېيدنې له امله د سالنګونو د ساتنې او څار امريت دوه کارکوونکي له يو سکواټور سره واورې لاندې کړي او تر اوسه لادرکه دي.
د سالنګونو د ساتنې او څارنې امر جنرال عبدالرجب او د هغه ٧ ساتونکي هم واورو لاندې کړي وو ، خو ژغورل شوي دي .
يادې څرګندونې د سالنګونو د ساتنې او څار امريت مرستيال عبدالظاهر پژواک خبري اژانس ته وکړې او ويې ويل چې په پېښه کې جنرال رجب لږ صدمه ليدلې ، خو ساتونکيو ته يې زيان نه دى رسېدلى.
هغه زياته کړه ، چې د رجب سينې يو څه ” ضربه ليدلې ” او روغتيايي حالت يې ښه دى .
د سرچينې د معلوماتو له مخې، سکواټور او د هغه چلوونکى او کلينر د شمالي سالنګ په ١٩مه ګراګرۍ سيمه کې له سړک څخه واوره پاکوله او جنرال رجب او د هغه ٧ ساتونکي په دوو لنډکروز موټرو کې سيمې ته ورغلي و ، چې واروه وښوېيده او ټول يې لاندې کړل.
دى وايي، چې جنرال رجب او ساتونکي يې په سيمه کې د دې امريت نورو شته کسانو ژغورلي ، خو سکواټور او د هغه چلوونکى او کلينر تر اوسه ( سهار اته نيمې بجې ) لادرکه دي .
جنرال رجب هم د ټېلېفون پر ليکه له پژواک خبري اژانس سره لنډې خبرې وکړې ، دغه پېښه يې تاييد کړه او ويې ويل چې روغتيايي حالت يې ښه دى .
ظاهر زياته کړه ، چې د ورکو شويو کسانو د موندلو هڅې روانې دي او جنرال رجب او ساتونکي يې تر اوسه د پېښې په سيمه کې دي ، ځکه چې لاره واورو بنده کړې ده .
هغه وويل، چې له تېرې ورځې راهيسې په جنوبي سالنګ کې ٢١ او په شمالي سالنګ کې ١١ ځايه ډېرې واورې ښوېيدلي اوسړک يې بند کړى دى .
د سالنګ لويه لار ، چې د هېواد مرکز له نهو شمالي ولايتونو سره نښلوي ، تېره ورځ سهار څلور بجې د واورو ښوېيدنې له ويرې د ترافيکو پر مخ وتړل شوه .
د سالنګونو د ساتنې اوڅار امريت مرستيال د معلوماتو له مخې، له وړمې ورځې راهيسې په سالنګ کې شاوخوا درې متره واوره اورېدلې ده .
په ژمي کې پر دې لاره، چې په غرونو کې له اوږده تونل څخه تيريږي ،تګ راتګ له ډېرو ستونزو سره مخ وي.
د ١٣٨٨ کال د سلواغې په مياشت کې په سالنګ کې په لسګونو خلک د واورو ښووېيدو له امله مړه او سلګونه نور ټپيان شول.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن