کابل ( پژواک ١٥ کب ١٣٩١): جاپان له افغانستان سره د ځينو پروژو د پلي کولو او تېلو د پېرلو لپاره ١١٦،٩ميليون امريکايي ډالره مرسته کوي .
د دې مرستې تړون نن د افغانستان د بهرنيو چارو وزير زلمي رسول او په کابل کې د جاپان سفير هيروشي تا کاشي په کابل کې لا سليک کړ .
زلمي رسول وويل ، چې له يادې مرستې څخه ٣٤،٦ مېليون ډالره ماليې وزارت ته ورکول کيږي ، چې د دولت لپاره تېل پرې وپېري .
د هغه د معلوماتو له مخې ، د جاپان د دې مرستې ٣١،٦ مېليون ډالر په ده سبز کې د نوي ښار د اوبو رسولو پر پروژې ، ١٦،٨ ميليون ډالر دکابل هوايي ډګر دالوتکو لپاره دپارګينګ او د ترمينل په بريښنايي سيسټم او ٣٣،٩ مېليون ډالر د سړکونو دساتنې او بيارغوني په برخو کې لګول کيږي.
خو هغه ونه ويل ، چې دغه پېسې به په څومره موده کې پر يادو پروژو ولګول شي .
په کابل کې د جاپان سفير په نننۍ ناسته کې وويل ، چې د مرستې يادې پيسې د هغو ژمنو برخه ده ، چې هېواد يې د توکيو په کنفرانس کې له افغانستان سره کړې ده .
جاپان له افغانستان سره په توکيو کنفرانس کې د درې مېليارد امريکايي ډالرو مرستې ژمنه کړې وه .
تاکاشي وويل ، چې د نننۍ مرستې په ګډون جاپان د توکيو په کنفرانس کې د کړې ژمنې نيمايي برخه پوره کړې او پاتې مرسته به تر ٢٠١٦ پورې له افغانستان سره وکړي .
جاپان له امريکا متحده ايالتونو وروسته له افغانستان سره دويم لوى مرسته کوونکى هيواد دى .
د ماليي وزارت د معلوماتو له مخې، جاپان په تېرو شاوخوا ١١ کلونو کې له افغانستان سره شاوخوا ٣ميليارد امريکايي ډالره مرسته کړې ده .
