جلال اباد (پژواک ١٢ ورى ٩٢): د افغانستان په ختيځو ولايتونو ننګرهار او نورستان کې دوه پوليس وژل شوي دي.
د ننګرهار د امنيه قوماندانۍ مطبوعاتي مسوول سمونيار حضرت حسين مشرقيوال د وري په ١٢مه پژواک خبري اژانس ته وويل، چې نن سهار د هسکې مېنې ولسوالۍ په ياغي بند سيمه کې د پوليسو پر يوې ګزمې چاودنه شوې ده.
هغه زياته کړه، چې په دې چاودنه کې يواځې يو پوليس وژل شوى او بل چا ته زيان نه دى اوښتى.
بلخوا د نورستان امنيه قومانداني وايي، چې د دغه ولايت په برګمټال ولسوالۍ کې تېره شپه د وسله والو او دولتي ځواکونو ترمنځ نښته شوې چې له امله يې يو پوليس وژل شوى او يو بل ټپي دى.
امنيه قوماندانۍ مخالف لوري ته د درنې مرګ ژوبلې ادعا کوي او وايي، چې عامو وګړو ته په کې کومه مرګ ژوبله نه ده اوښتې.
وسله والو طالبانو تر اوسه د يادو پېښو په اړه څه نه دي ويلي.
دغه راز د ننګرهار د امنيه قوماندانۍ مطبوعاتي مسوول وايي، چې نن سهار يوولس بجې د جلال اباد ښار د درونټې په پوسته کې يو سوزکي موټر چې ترياکو په کې بار و، نيول شوى دى.
مشرقيوال وايي، چې په تور يې يو تن هم د پوليسو لاسته ورغلى دى.
