جلال اباد ( پژواک ٢٠ ورى ٩٢ ) : وسله والو طالبانو د نورستان ولايت له مرکز څخه دوه پوليس تر تښتونې وروسته وژلي دي.
د نورستان ولايت د مرکز پارون د ولسي شورا مشر مولوي کريم الله د وري په ٢٠مه، پژواک خبري اژانس ته وويل، چې تېره شپه په يوه بجه وسله والو طالبانو دوه تنه د مرکز په دوه کيلو مترۍ کې وژلي دي.
هغه زياته کړه ، چې پوليس په خپله پوسته کې بيده وو، چې وسله والو طالبانو پر ډزو وژلي او وسلې يې هم ترې وړې دي .
نوموړى وايي، چې ددې پوليسو د جنازې مراسم نن په پارون کې ترسره شول.
خو د نورستان امنيه قوماندان مل پاسوال عبدالکريم عمريار وايي، چې ياد پوليس تښتول شوي ، خو تر اوسه يې له وژل کېدو خبر نه دى.
وسله والو طالبانو تر اوسه په دې اړه څه نه دي ويلي.
