هرات ( پژواک ٢٥ ورى ٩٢) : په هرات ښار کې سلګونه لاريون کونکو له حکومت څخه غوښتنه وکړه،چې د هرات اوسنى والي داوود شاه صبا دې له دې ولايت څخه نه بدلوي .
په دې لاريون کې نږدې ٤٠٠ تنو ګډون کړى وو، دوى د والي عکسونه له ځانه سره لېږدول ،لاريون له مرکزي چوک څخه سهار نهه بجې پيل او لس بجې د ولايت ودانۍ مخې ته پاى ته ورسېد.
د کشک رباط سنګي ولسوالۍ يو تن قومي مشر حاجي صالح محمد،چې په دې لاريون کې برخه درلوده وويل، داسې اوازه يې اورېدلې ،چې د هرات والي بدل شوى او پر ځاى يې د کابل والي راځي ، د هرات د خلکو غوښتنه دا ده ،چې حکومت خپله پرېکړه بېرته واخلي .
هغه ډاکټر صبا يو ملي شخص وباله او زياته يې کړه،چې د ده د کار په موده کې د بيارغونې کارونه او حکومتي اداره پر پښو ودرېده.
د مدني ټولنو په استازيتوب امين الله احمدي هم د والي د تبديلۍ مخالفت وکړ او ويې ويل ،چې د دې والي له تبديلۍ سره به په هرات کې ستونزې زياتې شي او د پرمختګ چارې به ټکنۍ شي.
د لاريون يو بل ګډون کوونکى عبدالله دا مني ،چې داوود شاه صبا د هرات لپاره کار کړى، خو زياتوي ،چې د دې تر څنګ يې اداري کمزوري هم درلوده او ځينې ادارې لکه ښاوالي يې له واکه وتلې دي .
نوموړى زياتوي، ادارې کمزوري يې دا وه ،چې سلا کاران يې ناسمه مشوره ورکوي او اداره د بې ثباتي پر لور بيايي.
خود والي وياند محي الدين نوري وايي، چې د والي د تبديلۍ په اړه رسمي مکتوب نه دى ورته رسيدلى ،د ده په وينا ، د ولسي جرګې ځينې وکيلان او يو شمېر کړۍ دي ،چې د والي پر خلاف خبرې کوي او د تبديلۍ اوازې يې خپروي.
هغه زياته کړه،چې له ښاروالۍ سره ستونزه له قانون څخه د سرغړونې پر سره وه او کومه شخصي ستونزه نه وه.
