کابل (پژواک ٢٧ ورى ٩٢): د افغانستان د ملي دفاع وزارت چارواکي وايي، پاکستاني لوري ورسره ژمنه کړې چې د ننګرهار له ګوشتې ولسوالۍ سره په سرحد کې به درولې دروازه بېرته لرې کړي.
پرون په کابل او ننګرهار کې چارواکو ويلي وو، چې پاکستان له ګوشتې سره په سرحد کې دروازه درولې او د نورو تاسيساتو په جوړولو يې هم لاس پورې کړى دى.
دغه کار د افغانستان له سخت غبرګون سره مخ شو او د نړيوالو اصولو خلاف يې وباله.
ولسمشر حامد کرزي د افغانستان ملي دفاع او کورنيو چارو وزارتونو ته امر وکړ، چې د ډيورند کرښې په اوږدو کې د دروازې، پوستې او د پاکستان د نورو تاسيساتو د لرې کولو لپاره بېړنۍ هڅې وکړي.
د ملي دفاع وزارت وياند جنرال محمد ظاهر عظيمي نن پژواک خبري اژانس ته وويل، چې تېره ورځ د ملي دفاع وزارت يو پلاوى د يادې ستونزې د حل په موخه اسلام اباد ته تللى و.
هغه وويل، چې پاکستاني لوري له دغه پلاوي سره د يادې دروازې د لرې کولو ژمنه کړې ده.
ده وويل، چې د دروازې لرې کېدو ته په تمه دي ترڅو په دې اړه د ملي دفاع وزارت خپل رسمي دريځ اعلان کړي.
د پاکستان پوځ هم په خپره کړې خبرپاڼه کې ويلي، چې د دروازې ستونزه يې له افغان چارواکو سره حل کړې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن