جلال اباد(پژواک، د غويي لومړۍ نېټه، ٩٢): د نورستان په کامدېش ولسوالۍ کې سيمه ييز پوليس فعال شول.
د نورستان امنيه قوماندان مل پاسوال عبدالکريم عمريار د غويي په لومړۍ نېټه پژواک خبري اژانس ته وويل، چې په کامدېش ولسوالۍ کې سل سيمه ييز پوليس فعال شوي دي.
نوموړى زياتوي، چې له سيمه ييزو پوليسو سره به د يادې ولسوالۍ امنيت نور هم ښه شي.
هغه وايي، چې دغو پوليسو ته د کورنيو چارو وزارت له لوري دوه مياشتينۍ روزنه هم ورکړل شوې ده.
د نوموړي پر وينا، په نږدې وختونو کې به يادې ولسوالۍ ته سل نور سيمه ييز پوليس هم ولېږي.
عمريار زياتوي: ((کامدېش د بهرنيو او کورنيو وسله والو په ځاله بدل شوى، چې د سيمه ييزو پوليسو په ورتګ به يې فعاليتونه شنډ شي.))
د کامدېش د سيمه ييزو پوليسو قوماندان نېک محمد اتل پژواک خبري اژانس ته خوښي وښوده، چې د سيمه ييزو پوليسو په ليکو کې دنده لري او وايي چې خدمت به وکړي.
خو د نورستان د ولايتي شورا مرستيال امان الله عنايت الرحمان پژواک ته وويل، چې د سيمه ييزو پوليسو فعالېدل به په نورستان ولايت کې کومې مثبتې پايلې ونه لري.
هغه وويل، چې که د سيمه ييزو پوليسو پر ځاى ملي پوليس او ملي اردو اکمال شوي واى، نتيجه به يې تر دې ډېره ښه وه.
د امان الله عنايت الرحمان په خبره، چې سيمه ييز پوليس په نورستان کې يو ډول ستونزې راپورته کوي او ښايي قومي تعصبونو ته لمن ووهي.
د يادونې ده، کامدېش د نورستان يوه له هغو ناامنو ولسواليو ده، چې وخت ناوخت ترې د ناامنۍ خبرونه ورکول کېږي.
تر دې مخکې د دغه ولايت په برګمټال ولسوالۍ کې هم سيمه ييز پوليس فعاله شوي وو.
