جلال اباد(پژواک ٣ غويى ٩٢ ) : د ننګرهار د حصارک ولسوالۍ ولسوال وايي، چې په لوګر ولايت کې د الوتکې تښتول شوې عمله دې ولسوالۍ ته لېږدول شوې ده.
د حصارک ولسوال حاجي عبدالخالق معروف د غويي په ٣مه پژواک خبري اژانس ته وويل ، چې نن يې داسې راپورونه تر لاسه کړي، چې تېره شپه وسله والو مخالفينو د يوې خصوصي کمپنۍ د الوتکې هغه عمله، چې تېره ورځ وسله والو نيولې وه، لومړى يې د ازرې او حصارک ولسواليو ترمنځ سيمې (تنګ) ته وړي او بيا يې د حصارک ولسوالۍ د اب زنګياني او غوږيزېسيمو ته را انتقال کړې ده.
هغه زياته کړه ، چې پراخې هڅې روانې دي، څو وسله وال د الوتکې تښتول شوې عمله خوشې کړي .
خو نوموړي په خپله ولسوالۍ کې د نظامي عملياتو په اړه څه ونه ويل.
معروف د اټکل له مخې وايي ، چې وسله وال مخالفين به هم له دولت څخه يو څه غوښتنې لري.
دى زياتوي: (( که چېرې څوک غواړي ، چې دغه عمله خوشې شي، نو زه يې يوه طرحه لرم او بايد له ماسره اړيکه ونيول شي، ډېر ژر به يې راخوشې کړم.))
بلخوا يوې استخباراتي سرچينې د نوم نه ښودلو په شرط پژواک خبري اژانس ته وويل ، چې د حصارک او ازرې ولسواليو تر منځ د تنګ په نوم دره کې وسله والو مخالفينو د يادو ترکي انجنيرانو يو شمېر وسايل په يوه کور کې ځاى پر ځاى کړي دي.
دغې سرچينې هم تاييد کړه، چې وسله والو د الوتکې ټوله عمله له تنګ په نوم سيمې څخه حصارک ولسوالۍ ته انتقال کړې ده.
بلخوا د لوګر د والي وياند دين محمد دروېش پژواک اژانس ته دا ونه منله، چې ګواکې د الوتکې عمله دې د حصارک ولسوالۍ ته لېږدول شوې وي.
دى وايي ، چې په دې اړه ورته کوم راپور نه دى رسيدلى، خو نوموړى زياتوي ، چې هڅې يې پيل کړي، تر څو بهرني او کورني ټول انجينران د وسله والو له منګلو راخوشې کړي.
د لوګر د ولايتي شورا رييس ډاکټر عبدالولي وکيل پژواک ته وويل، چې دوى دقومي مشرانو په هڅو د تښتول شويو بهرنيانو د خوشې کولو هڅې پيل کړې دي.
د هغه په وينا، د قومي مشرانو يوې ډلې له وسله والو طالبانو سره کتلي او د تښتوونکو ددرملنې لپاره يې يوه اندازه درمل هم ورته سپارلي دي.
ياده دې وي ، چې د خراسان په نامه د يوې خصوصي افغاني کمپنۍ الوتکه، چې له خوست څخه بګرام ته پر لاره د لوګر په ازرې ولسوالۍ کې بېړنۍ ناسته کړې وه .
وسله والو طالبانو ددغې الوتکې اته تنه ترکي انجنيرانو، دوه روسي او يو افغان پيلوټ تښتولي دي.
وسله والو طالبانو ويلي ، چې د تښتوونکو بهرنيانو روغتيايي حالت د ډاډ وړ دى.
