مزارشريف (پژواک، ٩ غويى ٩٢): د بلخ په مرکز مزارشريف کې د امريکا قونسلر کيتمنز وايي چې امريکا له طالبانو سره د سولې لپاره د افغان حکومت د روانو هڅو ملاتړ کوي.
کيتمنز ( keith Mines ) چې په مزار کې يې د امريکا د متحده ايالاتو قونسلر په توګه له ۱۲مياشتو دندې تر سره کولو وروسته د غويي په ۹مه،د خپلې دندې په وروستۍ ورځ خبرې کولې ، وويل : “د سولې موضوع د افغانستان او د طالبانو ترمنځ ده او مريکا دغه پروسه څاري او ملاتړ يې کوي.”
د ده په خبره، امريکا د سولې د هغه ډول هڅو ملاتړ کوي، چې د افغانستان له اساسي قانون سره مخالفې نه وي او د افغانانو له دود او دستور سره مخالفت ونه لري.
خو هغه زياته کړه، چې د جګړې پرېښودو په بدل کې بايد نور ارزښتونه تر پښو لاندې نه شي.
ده زياته کړه، چې امريکا په تېرو لسو کلونو کې د افغانستان په شمال کې د امنيتي ځواکونو لپاره د بنسټيزو چارو په برخه کې ۸۰۰ ميليونه امريکايي ډالر لګولي، چې په دې کې ۴۷۱ميليونه ډالر په بلخ ولايت کې لګول شوي دي.
همداراز دى وايي ، چې امريکا په تېرو لسو کلونو کې په ټول شمال کې د پوهنې، کرنې او نورو برخو کې هم ۶۰۰ ميليونه امريکايي ډالر لګولي دي.
د هغه په وينا، امريکا د راتلونکي لپاره هم د افغانستان په شمال کې د بيارغونې او پراختيايي چارو په برخه کې د مرستو پلانونه لري.
کيتمنز د بېلګې په توګه د شمال د نفتو او ګازو يادونه وکړه، چې امريکا په کې لېوالتيا لري او په دې برخه کې يې پانګه اچونه هم کړې ده.
همداراز د امو سيند په اوږدو کې ډېرې طبيعي سرچينې شته، چې ورباندې کار پيل شوی دی.
ده زياته کړه، چې افغان ځواکونه اوس سمبال شوي ، روحيه يې غښتلې شوې او خپله دنده په ښه توګه تر سره کولی شي.
د هغه په وينا، د دې تر څنګ به نړيوال ځواکونه هم تر راتلونکو پنځو کلونو پورې له افغان ځواکونو سره په مالي او تخنيکي برخو کې ملګري وي.
هغه وويل ، چې افغان ځواکونه له بل هر څه ډېر د خپلو خلکو ملاتړ ته اړتيا لري او له دې ملاتړ پرته به له ستونزو سره مخ شي.
ده وويل ، چې د راتلونکي کال د وري په مياشت کې به د افغانستان د ولسمشرۍ او ولايتي شوراګانو ټاکنې د افغانانو ترمنځ د سياسي پرمختګ لپاره تر ټولو ښه چانس وي.
د هغه په وينا، هر ډول ټاکنې له خپله ځان سره ستونزې لري.
کيتمنز وويل: “په افغانستان کې امنيت، د ټاکنو روڼتيا او د لوجستيکو توکو رسونه د راتلونکو ټاکنو لپاره ستونزې ګڼلی شو. “
