هرات ښار (پژواک، ٩ غويى ٩٢): د بادغيس امنيتي مسوولين وايي، چې په بالامرغاب ولسوالۍ کې د وسله والو طالبانو په بريد کې پنځه سرحدی پوليس وژل شوي دي.
په لوېديځ زون کې د سرحدی پوليسو قوماندان جنرال شېر احمد ملداني پژواک خبري اژانس ته وويل، چې تېره شپه شاوخوا ٢٠٠ وسله والو طالبانو د بالامرغاب ولسوالۍ د سرحدي ځواکونو پر يوې پوستې بريد کړى وو.
ده زياته کړه، په دې نښته کې پنځه سرحدي پوليس وژل شوي او يو بل ټپي دى.
د هغه په وينا: “د نښتې په ځاى کې داسې نښې ښکاري، چې طالبانو ته هم درنه مرګ ژوبله اوښتې ده، خو دقيقه شمېره يې نه ده څرګنده.”
د نښتې له سيمې څخه د عبدالله په نوم يوه تن د ټېلېفون په ليکه پژواک اژانس ته وويل، چې طالبانو د شپې پرمهال د سرحدي پوليسو يوه پوسته نيولې وه.
د ده په خبره، په دغې پوسته کې د سرحدي پوليسو پنځه سرتېري وژل شوي او طالبانو د هغوى وسلې له ځان سره وړې دي.
وسله والو طالبانو د يادې نښتې په اړه تراوسه څه نه دي ويلي.
