لښکرګاه (پژواک ٢١ غوايى ٩٢): د هلمند د برېښنا چارواکي وايي، وسله والو له تېرو څلورو ورځو د لښکر ګاه برېښنا پرې کړې او د هغوى له اجازې پرته ښار ته برېښنا نه شي راوستلاى.
د هلمند د برېښنا رييس انجينر فيض الله د غويي په ٢١مه پژواک اژانس ته وويل، پنځه ورځې وړاندې د کندهار په ميوند ولسوالۍ کې ترسره شوو عملياتو وسله وال طالبان او عام خلک په غوسه کړي وو.
نوموړى وايي، تر عملياتو وروسته وسله والو په ميوند ولسوالۍ کې د کندهار لور ته د غځېدلې برېښنا درې پايې پر ماينونو والوځولې او وروسته يې پر لښکرګاه هم برېښنا پرې کړه.
وسله والو درې ورځې مخکې د سنګين او ګرشک ولسواليو ترمنځ د کمپرک په سيمه کې له کجکې څخه لـښکرګاه ته غځېدلي مزي پرې کړل.
د برېښنا رييس زياتوي، چې دوى له ځايي وسله والو سره تفاهم لري نو له همدې امله يې خپله تخنيکې ډله سيمه ته د مزو د بېرته جوړېدو لپاره ولېږله، خو د طالبانو لوري له وسايلو سره ونيول شوه.
د ده په خبره، تر خبرو وروسته يې خپل کارکوونکي او يوه عراده کرينګ بېرته راخوشي کړل خو د برېښنا ستونزه لا پر ځاى پاتې ده.
هغه وايي: ((له وسله والو سره معامله نه لرو، د برېښنا شرکت له ١٥ زره مشترکينو پيسې راټولوي، خو وسله وال بيا د خپل واک په سيمو کې له ٢٥ زره مشترکينو پيسې اخلي، چې په هرو دوو مياشتو کې ٥٥ ميليونه افغانۍ کېږي.))
د برېښنا رييس زياته کړه، دا چې طالبان لښکرګاه ته برېښنا نه پرېږدي نو دوى پرېکړه کړې، چې د طالبانو د واک په سيمو به برېښنا پرې کړي.
د لښکرګاه خلک له دولتي چارواکو او وسله والو طالبانو غوښتنه کوي، چې د برېښنا له پروژې دې سياسي معامله نه جوړوي او دا ستونزه دې هواره کړي.
د لښکرګاه ښار يو هټيوال وايي، چې دولتي ادارې له ډيزلي برېښنا کار اخلي، خو خلک له ستونزو سره مخ شوي ګرمي هم زياته ده او د برېښنا له پرې کېدو وروسته د سون توکو بيه هم لوړه شوې ده .
د جلال الدين په نوم د لښکرګاه استوګن شکايت کوي، چې له تېرو درېيو ورځو په کورونو کې اوبه نشته او خلک له سختو ستونزو سره لاس او ګرېوان دي .
وسله وال طالبان د برېښنا د پرېکولو په اړه رسنيو ته څه نه وايي.
