لښكرګا(پژواك ۲۹ غوايى ۹۲): د هلمند د ناوې ولسوالۍ اوسېدونكي وايي، چې د ملي اردو سرتېرو د سيمې يو اوسېدونکى په وهلو او ډبولو وژلى دى.
د نوموړې ولسوالۍ لسګونه اوسېدونكو نن د وژل شوي كس جسد د هلمند ولايت مقام مخې ته د احتجاج په توګه راوړى و او له دولتي چارواكو يې غوښتنه كوله، چې وژونکو عسکرو ته دې سزا وركړل شي.
د ناوې اوسېدونکى مولوي عبدالرشيدوايي، دوه ورځې مخکې د ناوې ولسوالۍ په شور شورك سيمه كې د ملي اردو په قرارګاه ډزې وشوې، په سبا يې د اردو سرتېرو شپږ کليوال له ځان سره بوتلل.
نوموړي د غويي په ٢٩مه پژواک اژانس ته وويل، چې د پنځو نورو كسانو په اړه معلومات نه لري خو يو تن يې تر ډېرو وهلو لاندې وژلى دى.
حاجي سيدګل چې د دغو کسانو په ملګرتيا لښکرګاه ته راغلى و وايي، چې د اردو کسانو قومي او ژبنى تعصب کړى او بې ګناه کليوال يې په وهلو ډبلو وژلى دى .
د ده په خبره، د ملي اردو يوه سرتېري د وژل شوي كس د جسد د وركړې پر مهال ورته وويل: ((پښتنو له ځانه بدمعاشان جوړ كړي كه ځان سم نه كړئ دغه به مو حال وي.))
خو د هلمند د والي وياند عمر ځواك وايي، چې اردو پنځه شکمن کسان نيولي او پوښتنې يې تېرې پيل کړې دي.
دى وايي، د پېښې د پلټنې په موخه يې سيمې ته پلاوى لېږلى تر څو د خلکو د غوښتنو په اړه معلومات راټول کړي.
د نوموړي په وينا، د دې څېړنې پايلې به وروسته د رسنيو په واك كې وركړي.
