مزارشريف ( پژواک ٣١ غويى ۹۲) : په بلخ کې د ملي پيوستون د پروژو دويمه لړۍ پيل شوه ، چې په ترڅ کې به يې د دې ولايت په ١١ ولسواليو کې د ٢٧ ميليون امريکايي ډالرو په لګښت سلګونه پروژې پلې شي.
د کليو د بيارغونې او پراختيا وزارت د ملي پيوستون د پروګرام له لارې د دويم او درېيم درجه سړکونو ، د ښوونځيو او کلينيکونو د ودانيو ، استنادي دېوالونو،ټولنيزو شوراګانو ودانيو او وړو بندونو د جوړولو او څښاک اوبو د برابرولو پروژې د دې وزارت له بوديجې پلې کيږي.
د ملي پيوستون د پروژو دويمه لړۍ نن د بلخ ولايت د دهدادي ولسوالۍ په هزارجريب کلي کې د پراختيايي شورا د غونډو لپاره د سالون د جوړېدو د کار په پيل کېدو، پرانيستل شوه.
د بلخ ولايت د کليو د بيارغونې او پراختيا رييس باسط عيني پژواک خبري اژانس ته وويل، چې دغه سالون به په راتلونکو شپږ مياشتو کې د څه کم يو نيم ميليون افغانيو په لګښت جوړ او ګټې اخيستنې ته چمتو شي.
د دهدادي ولسوالۍ د پراختيايي شورا مشر حاجي سيد مصطفی وويل، چې په دغه ولسوالۍ کې پراختيايي شورا د جرګو لپاره مناسب ځای نه درلود، چې د ياد سالون په جوړېدو به دغه ستونزه حل شي.
د هغه په وينا ، ډېر ژر به په دې ولسوالۍ کې د يو ميليون او ۶۰۰زره افغانيو په لګښت د څښاک اوبو د يوې پروژې کار هم پيل شي.
د بلخ ولايت د کليو او پراختيا رييس باسط عيني پژواک خبري اژانس ته وويل، چې د ملي پيوستون په دويمه لړۍ کې د بلخ ولايت د ۱۱ولسواليو ۷۰۴کلي تر پوښښ لاندې راځي.
د هغه په وينا ، د ملي پيوستون پروژو دغه لړۍ به په راتلونکو دوو کلونو کې بشپړه شي او په ترڅ کې به يې سلګونه يادې پروژې د ۲۷ميليون امريکايي ډالرو په لګښت پلې شي.
چارواکي وايي، چې تر اوسه په دې ولايت کې د ملي پيوستون ګن شمېر پروژې پلې شوي دي.
