غزني- هرات ( پژواک ٤ چنګاښ ٩٢) چارواکي وايي،چې د غزني په اب بند ولسوالۍ کې طالبانو د ملي اردو پنځه سرتېري وژلي دي .
د غزني د والي د دفتر سکرټر نبي جان د چنګاښ په ٤مه پژواک اژانس ته وويل،چې دغو سرتېرو په اروزګان کې دنده لرله او اوس په رخصتۍ کورته روان وو.
د ده په وينا، طالبانو د ملي اردو دغه سرتېري د اب بند په ولسوالۍ کې د کابل – کندهار پر لويه لاره پرون له موټره ښکته کړى وو او نن سهار يې د اندړو ولسوالۍ په ابو کلا کې مړي وموندل شول.
د غزني د ملکي روغتون رييس ډاکټر باز محمد همت وايي،چې روغتون ته د ملي اردو د پنځو سرتېرو مړي وروړل شوي دي.
هغه وايي،دوه تنه يې پېژندل شوي،چې يو يې د کونړ او بل يي د کندوز اوسېدونکي وو.
تر دې مخکې هم ورته پېښې رامنځ ته شوي،چې وسله والو طالبانو امنيتي سرتېري او دولتي مامورين له موټرو ښکته کړي او بيايې وژلي دي.
د يو بل خبر له مخې،د هرات ښار په اومه ناحيه کې يوه خاوند د خپلې مېرمنې سر پرې کړى دى.
د هرات دامنيه قوماندانۍوياند عبدالرووف احمدي وايي،چې پېښه تېره شته دکورني تاوتريخوالي له امله رامنځ ته شوې ده.
د احمدي په وينا،د مېرمنې خاوند تښتېدلى او د پېښې د علت په اړه پوليسو پلټنې پيل کړې دي.
په هرات کې په دې وروستيو کې د مېرمنو پر وړاندې تاوتريخوالي زيات شوي دي.
