جلال اباد(پژواک،٦چنګاښ٩٢): په لغمان ولايت کې د يوه سيمه ييز پوليس په ګډون ، پنځه تنه ووژل شول.
د لغمان د والي وياند سرحدي ځواک پژواک خبري اژانس ته وويل ،چې نن ماسپيښن دوه نيمې بجې د لغمان ولايت مرکز اړوند د عمرزيو په قصابانو کلي کې په يوه کرولا موټر د سړک د غاړې ماين چاودنه وشوه.
هغه زياته کړه، چې په چادونه کې څلور عام وګړي او يو سيمه ييز پوليس وژل شوي دي.
د والي وياند وويل، چې د وسله والو مخالفينو له لوري د سړک پر غاړه ماين ځاى پر ځاى شوى و، چې د چاودنې له امله يې يو ملکي وګړى ټپي شوى هم دى.
طالب وياند ذبيح الله مجاهد د چاودنې مسووليت پر غاړه اخيستى، خو ادعا کوي، چې دلغمان په عمرزيو کې دماين په چاودنه کې دسيمه ييزو پوليسو د قوماندان سميع الله په کډون پنځه تنه سيمه ييز پوليس يې وژلي دي.
د يادونې ده، چې درې مياشتې وړاندې د لغمان په الينګار ولسوالۍ کې پر يوه خره د تړل شويو چاودېدونکو توکو په چاودنه کې يو سيمه ييز پوليس هم وژل شوى او درې ملکي وګړي ټپيان شوي وو.
