هرات ښار (پژواک ٢٠ چنګاښ ٩٢): په هرات کې د روغتيايي علومو د انسټيټيوټ ودانۍ د بنسټ ډبره کېښودل شوه.
د هرات والي فضل الله وحيدي د چنګاښ په ٢٠مه د دې ودانۍ د بنسټ اېښودو پر مهال په خبرو کې د ودانۍ د چارو پر ښه کيفيت ټينګار وکړ.
هغه زياته کړه، چې د روغتيايي کار کوونکو د روزنې په برخه کې د دغه انسټيټيوټ جوړېدل مهم او ګټور کار دى.
د هرات د عامې روغتيا رييس ډاکټر غلام سعيد راشد پژواک اژانس ته وويل، چې ياده ودانۍ به په څلورو پوړونو کې جوړه او چارې به يې د يوه کال په موده کې بشپړې شي.
هغه زياته کړه، پر دې ودانۍ نږدې ٣٨ ميليونه افغانۍ لګښت راځي چې د جاپان هېواد له خوا ورکول کېږي.
راشد وايي، د هرات د روغتيايي علومو د انسټيټيوټ پخوانۍ ودانۍ ۳۲ کاله وړاندې د وخت اړتيا ته په پام سره جوړه شوې وه، چې ځای يې کم او ودانۍ يې هم زړه شوې وه.
د نوموړي په وينا، دا مهال په ياد انسټيټيوټ کې د نرسنګ او قابلګۍ په څانګو کې ۲۷۰ تنه په زده کړو بوخت دي چې ٨٠ سلنه يې نجونې دي.
خو د عامې روغتيا رييس وايي، چې د نوې ودانۍ په جوړېدو سره به راتلونکى کال په کې د فارمسي، لابراتوار، غاښونواو اېکسرې څانګې هم پرانيستل شي.
د دغه انسټيټيوټ يو زده کوونکى محمد نادر وايي، چې د ځاى د کموالي او زوړ والي له امله يې د زده کړو بهير له ستونزو سره مخ دى.
هغه پژواک اژانس ته وويل، چې د نوې ودانۍ په جوړېدو سره به د محصلينو ډېرې ستونزې هوارې شي.
