مزارشريف ( پژواک،۲۵ چنګاښ ۹۲) : د بلخ د والي وياند وايي،د نفوسو احوال د ثبت قانون د طرحې په اړه د ولسي جرګې تصويب مشروعيت نه لري او والي عطامحمد نور ته د منلو نه دى.
د بلخ د والي وياند منير فرهاد د چنګاښ په ۲۵مه، پژواک خبري اژانس ته وويل، چې د نفوسو احوال د ثبت قانون طرحه په داسې حال کې ولسي جرګې تصويب اعلان کړې، چې د پرېکړې لپاره د وکيلانو شمېر پوره نه و او زيات شمېر وکيلان په اعتراضيه ډول د جرګې له تالار څخه ووتل.
ولسي جرګې،تېره ورځ د نفوسو احوال د ثبت قانون طرحې پر سر د دوو وکيلانو تر فزيکي شخړې وروسته، ياده طرحه تصويب کړه، خو ځينې وکيلان د اعتراض په توګه له غونډې ووتل.
د وکيلانو تر وتلو وروسته د ولسي جرګې لومړي مرستيال ميرويس ياسيني وويل ، چې د رايې ورکولو پر مهال د جرګې د غړيو شمېر١٣٦ تنه و او له دې ډلې ١٠٥ تنو يې د يادې طرحې د تصويب په موخه شنه کارتونه پورته کړي او دغه طرحه تصويب شوې ده .
د ملي شورا په انګړ کې اعتراض کوونکو وکيلانو چې شمېر يې شاوخوا لسو تنو ته رسېده ټينګار کاوه، چې په تذکره کې بايد د مليت نوم ذکر شي.
خو په ياده ماده کې راغلي، چې پر تذکره دې مليت نه ليکل کېږي، خو د تذکرې په ډېټابېس کې دې ذکر وشي.
د بلخ والي عطا محمد نور يو له هغو کسانو دى ، چې پر تذکره د قوم د نوم ليکلو سخته پلوي کوي . ده په تذکره کې د مليت د نه ليکلو په صورت کې د تذکرې د نه اخيستو ګواښ هم کړی و.
هغه يوه مياشت وړاندې په خبري ناسته کې ويلي و : (( ټول په دې وياړ کوو، چې د افغان په نامه ياد شو . موږ د افغان په نامه له تابيعت سره مشکل نه لرو؛ خو د قوم نوم بايد په تذکرو کې ياد شي.))
ده زياته کړې وه : ((که داسې ونه شوه، نو نوره خبره سرې کرښې ته وځي او بيا موږ هر کار کوو.))
د بلخ د والي وياند منير فرهاد نن وويل ، چې په تذکره کې د قوم ذکر کول د هر افغان حق دی او د بلخ والي په دې اړه په خپله خبره لا هم ولاړ دی.
