قلعه نو (پژواک ١١ زمرى ٩٢): امنيتي چارواکي وايي، په بادغيس کې دوه دولتي سرتېري او درې وسله وال طالبان وژل شوي دي .
په لوېديځ کې د ٢٠٧ ظفر قل اردو يوه لوړپوړي افسر چې نه يې غوښتل نوم يې څرګند شي، پژواک خبري اژانس ته وويل، چې امنيتي ځواکونو تېر ماښام د دغه ولايت د مقر ولسوالۍ په تيموريانو کلي کې ماين کشف کړ، خو د شنډولو پر مهال وچاودېد.
سرچينه زياتوي، چې په دې چاودنه کې د ملي اردو يو سرتېرى وژل شوى او درې نور ټپيان دي .
هغه وايي، چې ټپيان روغتون ته لېږدول شوي او روغتيايي حالت يې ښه دى .
خو په سيمه کې د سخي داد په نوم يو تن وايي، ده وليدل چې په چاودنه کې د ملي اردو شپږ تنه ټپيان او يو وژل شوى کس يې امبولانسونو ته پورته کول .
د يو بل خبر له مخې، تېره ورځ مازديګر مهال د قلعه نو– هرات پر لاره د سبزک کوتل په سيمه کې د طالبانو او پوليسو تر منځ نښته شوې ده .
د بادغيس امنيه قوماندان مل پاسوال شرف الدين شرف وايي، وسله وال طالبان سړک ته راوتلي وو او خلکو امنيتي ځواکونو ته شکايت وکړ چې مالونه يې لوټي.
د ده په وينا، له همدې امله پوليس سيمې ته ورغلل او يو ساعته نښته رامنځته شوه .
دى وايي، چې په دې نښته کې يو پوليس او درې طالبان وژل شوي، چې مړي يې هم د جګړې پر ډګر پاتې دي.
د هغه د څرګندونو له مخې، په دې نښته کې دوه طالبان ټپيان شوي هم دي .
طالبانو په دې اړه څه نه دي ويلي.
