د هېواد پر ښوونځيو ٣٤ ميليونه کتابونه وېشل کېږي

کابل (پژواک ٦ وږى ٩٢): په ټول هېواد کې ٣٤ ميليونه ټوکه د ښوونځيو کتابونه په داسې حال کې وېشل کېږي، چې لا هم په ١١ ولايتونو کې ٤٠٠ ښوونځي تړلي دي.

د پوهنې وزيرغلام فاروق وردک نن په يوه خبري غونډه کې وويل، چې دغه ښوونځي په نا امنه ولايتونو کې تړل پاتې دي.

که څه هم ده د کوم ځانګړي ولايت  نوم وانه خيست خو اروزګان، کندهار، زابل او غزني  هغه  نا امنه ولايتونه دي،  چې خلک او چارواکي يې هر وخت د تړلو ښوونځيو په اړه شکايتونه کوي او بېرته پرانيستل يې غواړي.

هغه زياته کړه، چې په دغو ولايتونو کې ١١٠٠ښوونځي تړلي وو، خو په تېرو پنځو کلونو کې ٧٠٠يې د خلکو په همکارۍ او د پوهنې وزارت  په هڅو بېرته فعال شوي دي.

خو د پوهنې وزير زياته کړه، ياد وزارت هڅه کوي،  چې د خلکو په مرسته تړل شوي ښوونځي بېرته پرانېزي.

د پوهنې وزير په تول هېواد کې د ٣٤ميليونه ټوکه لومړنيو درسي کتابونو (له لومړي تر شپږم ټولګي پورې) د درسي کتابونو د وېش خبر ورکړ او ويې  ويل، چې ١٠ميليونه يې په افغانستان او پاتې په اندونيزيا کې چاپ شوي دي.

هغه زياته کړه، چې دغه کتابونه په ښه کيفيت او رنګ د ٢٠ميليونو امريکايي ډالرو په ارزښت د امريکا د نړيوالې پراختيايي ادارې (USAID)  مرسته چاپ شوي دي.

غلام فاروق وردګ زياته کړه، د پوهنې وزارت له  تېرو لسو کلونو راپه دېخوا وکولى شول،  چې   ٢١٣ ميليونه ټوکه کتابونه  له لومړي ټولګي تر دوولسم پورې د امريکا، ډنمارک او نړيوال بانک په  ١١٩ ميليونه امريکايي ډالرو مرسته چاپ کړي او وايي چې يو شمېر نور يې هم تر چاپ لاندې دي.

نوموړي زياته کړه: ((چې د افغانستان خلک دې له ٢٠١٤ کال څخه اندېښنه نه لري، لږ تر لږه تر راتلونکو لسو کلونو پورې مو د تمويل لارې لټولې او د لسو کلونو لپاره پروګرامونه او پيسې لرو.))

په همدې حال کې، د پوهنې وزير او د USAID د پوهنې د برخې مسوول ډيويد برنز تر منځ د يو ميليون ډالرو په ارزښت يو هوکړه ليک هم لاسليک شو.

د پوهنې وزير د امريکا له مرستو د مننې تر څنګ وويل، چې دغه پيسې به د ٣٤ميليونه کتابونو د لېږد په برخه کې ولګول شي.

د USAID د پوهنې د برخې مسوول له پوهنې سره د خپلو همکاريو د دوام په ځانګړې توګه له ٢٠١٤ کال څخه وروسته، خبر ورکړ او زياته يې  کړه: ((موږ له افغانستان سره خپلو مرستو ته دوام ورکوو.))

هغه د پوهنې وزارت د کړنو ستاينه وکړه او ويې ويل، چې افغانستان د پوهنې په برخه کې د پام وړ لاسته راوړنې لري.