چاريکار (پژواک ٩ وږى ٩٢): د پروان په بګرام ولسوالۍ کې پر سړک د ځاى پر ځاى شوي ماين په چاودنه کې د يوه خصوصي شرکت ٧ کارکوونکي وژل شوي او پنځه نور ټپيان دي.
د بګرام امنيه قوماندان سمونوال حشمت الله پژواک خبري اژانس ته وويل، چې د کرومايټ ډبرو د استخراج کوونکي دغه خصوصي شرکت د کارکوونکو پر موټر د ماين چاودنه نن له غرمې وروسته دوه بجې د بګرام په ژاله کلا کې رامنځته شوه.
هغه وويل، چې دغه کسان په بګرام کې د کرومايټ ډبرو يوکان ته پرلاره وو، چې په موټر يې چاودنه وشوه.
د ده د معلوماتو له مخې، په وژل شوو کې يو د ننګرهار د مرکز جلال اباد اوسېدونکى دى او پاتې نور وژل وژل شوي او ټپيان د پروان د بېلابېلو سيمو اوسېدونکي دي.
سرچينې زياته کړه، چې په چاودنه کې وژل شوي او ټپيان د پروان ولايتي روغتون ته لېږدول شوي دي.
د پروان د عامې روغتيا مشر ډاکټر محمدقسيم سعيدي وايي، چې له يادو ټپيانو څلور يې چې روغتيايي حالت يې د اندېښنې وړ و ، د نورې درمنلې لپاره کابل ته لېږدول شوي دي.
د هغه په وينا، پاتې يو کس چې روغتيايي حالت يې د ډاډ وړ دى، د پروان په روغتون کې تر درمنلې لاندې دى.
د دې چاودنې مسووليت تر دې دمه چا پر غاړه نه دى اخيستى.
