لښكرګاه (پژواك ۲۵وږى۹۲): د هلمند په مركز لښكرګاه كې د ترافيكي پېښې له امله د فوټبال يو لوبغاړى مړ شوى او درې تنه ټپيان دي.
د هلمند د اولمپيک امر محمد ادريس عليزي پژواک اژانس ته وويل، دغه ترافيکي پېښه هغه مهال رامنځ ته شوه، چې د هلمند ولايت د فوټبال ١٥ لوبډلو د ټورنمنټ د پاى نمانځنه کوله.
عليزى وايي، په دې پېښه کې د ټورنمنټ د اتلې ګرشک لوبډلې غړى ١٨ کلن مجيدالله مړ شوى او د يادې لوبډلې درې نور غړي ټپيان دي.
نوموړى زياتوي، د ګرشک لوبډلې ټپي شوي لوبغاړي د ايمرجنسي په روغتون کې تر درملنې لاندې دي او روغتيايي حالت يې په ښه کېدو دى.
د ده په خبره، لوبه د اتو لوبډلو تر منځ پيل شوې وه، چې د لښكرګاه په ګډون د درېيو ولسواليو لوبډلو په كې برخه اخيستې وه.
د اولمپيک د امر په وينا، پرون مازديګر د ګرشك او لښكرګاه د نوي ځوانانو ډلې وروستۍ لوبه وكړه، چې په ترڅ كې يې ګرشك لوبډلې دوه د يوه په مقابل كې لوبه وګټله او اته بجې يې د ګرشك په لور حركت وكړ.
عليزى زياتوي، لښكرګاه ته نږدې يې په لاره موټر ټكر كړى، چې له امله يې ياده مرګ ژوبله اوښتې ده.
د هلمند والي وياند عمر ځواك هم تاييدوي، چې ياده مرګ ژوبله په فوټبال كې بريالۍ لوبډلې ګرشك ته اوښتې ده.
دغه راز د هلمند د ترافيكو مدير خيرمحمد شجاع پژواك اژانس ته وويل، پېښه د ګرشک لوبډلې د موټر او يوه تراكتور د ټكر له امله رامنځته شوې ترافيک پوليس د پېښې په سيمه کې په څېړنو بوخت دي.
