هرات ( پژواک ٢٧ وږى ٩٢) : د هرات چارواکي وايي، چې په دغه ولايت کې يې د فراه لپاره د طالبانو مالي مسول نيولى دى.
د هرات دامنيه قوماندانۍ وياند سمونوال عبدالرووف احمدي پژواک ته وويل، د کشفي راپور په اساس يې د هرات ښار په درېيمه ناحيه کې د ملا تاجمير په نوم د فراه ولايت لپاره د طالبانو مالي مسوول نيولى دى .
نوموړى زياتوي، چې ملا تاجمير په څو ترهګريزو پېښو کې هم لاس درلود او دغه راز يې په کويټه کې د طالبانو له مشرانو سره نږدې اړيکې لرلې.
احمدي زياتوي، نوموړي د تحقيق په ترڅ کې خپل جرمونه منلي دي.
د يو بل خبر له مخې، تېره شپه ناپېژاندو کسانو د هرات د انجيل ولسوالۍ په مالان سيمه کې خاوند او ميرمن وژلي دي .
د هرات د امنيه قوماندانۍ وياند دغه پېښه تاييدوي او چې په اړه يې څېړنې پيل شوې دي.
ددغو کسانو مړي ، چې د هرات حوزوي روغتون ته وړل شوي ، د ياد روغتون وياند محمد رفيق شيرزى وايي، چې ښځې او خاوند زهري توکي خوړلي دي.
په هرات کې د ميرمنو د ځان وژنې او ځان سوځونې پېښې زياتې دي، خو دا پېښه لومړۍ هغه ده، چې مېړه او ميرمن په يو ځاى ځان وژنه کوي.
همدارنګه سمونوال عبدالرووف احمدي زياتوي، چې د هرات په شينډنډ ولسوالۍ کې يې نهه کلي له وسله والو پاک کړي دي.
هغه زياتوي، چې دغه تصفيوي عمليات تېره شپه د چټک غبرګون پوليسو او د ملي اردو کومانډو سرتېرو تر سره کړل.
د احمدي په وينا، په يادو عملياتو کې چا ته زيان نه دى رسيدلى.
د سيمې يو تن اوسېدونکى عبدالفتاح وايي، چې عمليات د شپې ناوخته پيل شول او په ټوله سيمه کې کور په کور تلاشي روانه وه.
هغه زياتوي، څو ځايه يې د ډزو غږونه واورېدل، خو اوږده او دومداره جګړه نه ده شوې.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن