د نورستان عملياتي قوماندان ووژل شو

کابل (پژواک ١٤ تله ٩٢): د نورستان ولايت د امنيه قوماندانۍ عملياتي قوماندان د ماين په يوه چاودنه کې ووژل شو.

د دې ولايت د والي وياند ظاهر بهاند د تلې په ١٤مه پژواک خبري اژانس ته وويل، چې دا پېښه نن سهار لس بجې په واما ولسوالۍ کې رامنځته شوې ده.

هغه زياته کړه، چې د امنيه قوماندانۍ عملياتي قوماندان مومن خان خپل کور ته تللى و او وسله والو مخالفينو د هغه د کور مخې ته ماين ځاى پر ځاى کړى و.

د بهاند په وينا، په دې چاودنه کې مومن خان لومړى ټپي و، خو وروسته يې ساه ورکړه.

وسله والو مخالفينو تر اوسه په دې اړه څه نه دي ويلي.