کابل( پژواک،٢١ تله ٩٢) : ولسمشر حامدکرزي د غزني ښار پرمرکزي جومات او د نورستان د دوآب ولسوالۍ پر مرکز بريدونه وغندل.
د ولسمشرۍ ماڼۍ د رسنيو له دفتره پژواک اژانس په رالېږل شوې خبرپاڼه کې راغلي، نن ماسپښين د افغانستان د خلکو دښمنانو د غزني ښار د مرکزي جومات په دروازه کې ځای پرځای کړی ماين وچولو، چې له امله يې دوه تنه لمونځ کوونکي وژل شوي او څلور نور ټپيان دي.
خبرپاڼه کاږي، پرون مازيګر د نورستان د دوآب ولسوالۍ پر مرکز باندې د يوه توغندي په بريد کې ، چې يوه جومات ته څېرمه ولګېده، له امله يې اوه تنه هېوادوال وژل شوي او اته تنه نور ، چې د مازيګر د لمانځه لپاره جومات ته روان وو ټپيان شول.
د خبرپاڼې له مخې، ولسمشرکرزي پر جوماتونو او د خلکو د تګ راتګ پر سيمو باندې د بريدونو ترسره کول په کلکه وغندل او هغه يې د ټولو اسلامي او انساني آرزښتونو پرخلاف د افغانستان د خلکو او د اسلام د دښمنانو کار و باله.
خبر پاڼه زياتوي،ولسمشر په دغو بريدونو کې د وژل شويو او ټپي شويو کورنيو ته د خواخوږۍ او ډاډګيرنې مراتب وړاندې کوي او ټپيانو ته د لوی خدای له دربار څخه د سملاسي روغتيا هيله کوي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن