اسعداباد (پژواک ٢٩ تله ٩٢): د کونړ چارواکي وايي، چې په ماڼوګي ولسوالۍ کې د بې پيلوټه الوتکې په بريد کې د سلفي ډلې د يوه قوماندان په ګډون درې تنه وژل شوي دي.
د ماڼوګي ولسوال عبدالمرجان عادل پژواک خبري اژانس ته وويل، چې نن سهار شاوخوا نهه بجې د دې ولسوالۍ په کلايګل سيمه کې امريکايي ځواکونو د بې پيلوټه الوتکې بريد وکړ.
ده زياته کړه، په دغه بريد کې د سلفي ډلې مهم قوماندان دوران چې په دعوت مشهور و، د هغه ورور مولوي قياس او يو بل تن ووژل شول.
د ياد قوماندان يوه ملګري د نوم نه ښودو په شرط پژواک اژانس ته د دوران وژنه تاييد کړه او زياته يې کړه، چې د نوموړي غايبانه جنازه هم ترسره شوې ده.
سلفي ډله په کونړ ولايت کې له وسله والو طالبانو سره يو ځاى د حاجي حيات الله په مشرۍ د دولت ضد وسله وال فعاليت کوي.
په افغانستان کې د سلفي ډلې بنسټ شيخ جميل الرحمن ايښى، چې په ١٩٩١زېږديز کال پاکستان کې د يوه عرب وسله وال په ډزو ووژل شو.
حاجي حيات الله د شيخ جميل الرحمن وراره دى.
