هرات (پژواک ٣٠ تله ٩٢): په هرات کې د سولې عالي شورا استازي وايي، د وسله والو د يوه قوماندان په ګډون لس کسيزه ډله د سولې له پروسې سره يو ځاى شوه.
د هرات د سولې شورا د مطبوعاتو د څانګې مسوول شېرافضل پوپل د تلې په ٣٠مه پژواک ته وويل، چې د وسله والو دغه لس کسيزه ډله د ملا سيداقا په مشرۍ تېره شپه په چشت شريف ولسوالۍ کې د سولې له پروسې سره يو ځاى شوه.
هغه زياتوي، د وسله والو دغه لس کسيزه ډله د قومي مشرانو په منځګړيتوب د سولې له پروسې سره يو ځاى شوه، چې ١٧ ميله وسله او تر سل کيلو زيات چاودېدونکي توکي او مهمات يې له ځان سره راوړل.
د دې وسله والې ډلې قوماندان ملا سيداقا خبريالانو ته وويل، له خپل دولت سره به د امنيت په برخه کې مرسته کوي او د دولت او نړيوالۍ ټولنې له لوري د ټولګټو پروژو د ساتنې ژمنه يې وکړه.
هغه زياته کړه، د ده ملګرو ته دې کاري زمينې برابرې شي او دغه راز دې نورو کسانو ته کاري فرصتونه ورکړل شي.
چشت شريف ولسوالۍ د هرات شمال ختيځ ۱۳۰ کيلومترۍ کې پرته ده او په نا امنو سيمو کې راځي، په دې سيمه کې د سلما بند کار د نا امنۍ له کبله ټکنى روان دى.
شاوخوا مياشت کې د هرات په ګذره ولسوالۍ کې هم د وسله والو يوه ١٣ کسيزه ډله د سولې له پروسې سره يو ځاى شوې وه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن