لښكرګاه (پژواك ۱۹ لړم ۹۲): د هلمند په ګرشك ولسوالۍ كې پر عملياتو پر مهال درې پوليسو او ۱۹ وسله والو طالبانو ته مرګ ژوبله اوښتې ده.
د ګرشك ولسوالۍ يوه امنيتي سرچينه چې نه غواړي نوم يې واخيستل شي وايي، تېره ورځ د ملي اردو او پوليسو له خوا د يخچال او ګوبند په سيمو كې د امنيت د ټينګښت او كوكنارو د كښت د مخنيوي په موخه عمليات پيل شوي دي.
سرچينه وايي، په عمليات كې ۷ وسله وال طالبان وژل شوي، چې د دريو وسله والو مړي په سيمه کې پاتې دي.
د سرچينې په وينا، په عمليات كې يو پوليس هم وژل شوى او د دوو پوليسو ترڅنګ ۱۱ طالبان هم ټپيان شوي دي.
هغه زياتوي، چې درې وسله وال په ټپي حالت کې نيول شوي دي.
د سرچينې په خبره، عمليات لا دوام لري او ډېرى سيمې يې د دولت له مخالفينو پاكې كړې دي.
د امنيه قوماندانۍ د مطبوعاتي دفتر مشر احمد فواد عسكري وايي، په عملياتو كې پنځه وسله وال وژل شوي او نهه نور ټپيان دي، نوموړي د پوليسو د مرګ ژوبلې په اړه څه ونه ويل.
عسكري زياته کړه، نن سهار د نادعلي ولسوالۍ په شمالي برخو كې د وسله والو د ځپلو او كوكنارو د كښت د مخنيوي په موخه د پوليسو له خوا عمليات پيل شول.
وسله والو طالبانو په دې اړه څه نه دي ويلي، خو قاري يوسف احمدي وايي، تېره ورځ يې په نوزاد ولسوالۍ كې د ماين په چاودنه كې دوه بهرني سرتېري وژلي دي.
