د ننګرهار د ښوونې او روزنې پوهنتون کې چاودنې لس تنه ټپيان کړل

جلال اباد(پژواک١١ليندۍ٩٢): د ننګرهار پوهنتون په ښوونې او روزنې پوهنځي کې د چاودنې له امله لس تنه ټپيان شوي دي.

د ننګرهار د والي وياند احمدضياء عبدالزي د ليندۍ په ١١مه پژواک خبري اژانس ته وويل، نن غرمه مهال يوولس نيمې بجې د ننګرهار پوهنتون د ښوونې او روزنې پوهنځي مخې ته په يوه موټر سايکل کې چاودېدونکي توکي ځاى پر ځاى شوي وو، چې د چاودنې له امله يې اووه تنه ټپيان شوي دي.

د والي وياند وايي، ټپيان روغتون ته د درملنې په موخه ليږدول شوي، چې دوه يې بستر او پاتې پنځه چې ټپونه يې سطحي وو، له روغتونه خارج شوي.

نوموړى وايي، موټر سايکل د ياد پوهنځي د يوه محصل و، چې په تم ځاى کې يې چاودنه کړې ده.

 د والي وياند وايي، د موټر سايکل مالک د پوليسو له لوري نيول شوى او د محصل په وينا، چې د يوه امنيتي ارګان کارکوونکى هم دى.

نوموړى وايي، چې شاوخوا ولاړ نور موټرونه او وسايط هم زيانمن شوي دي.

وسلوالو مخالفينو تر اوسه په دې اړه څه نه دي ويلي.

دا په داسې حال کې ده، چې شاوخوا شل ورځې مخکې د ننګرهار په پوهنتون کې هم چاودنې د ژورناليزم پوهنځي يو استاد ټپي کړى و.