د ننګرهار پوهنتون د شرعياتو پوهنځي کې د ماسټرۍ پروګرام پيل شو

 جلال اباد (پژواک١٣ليندۍ٩٢): د ننګرهار پوهنتون د شرعياتو پوهنځي د فقهې او قانون په برخه کې د ماسټرۍ پروګرام پيل شو.

 د ننګرهار پوهنتون رييس ډاکټر محمد صابر مومند د ماسترۍ پروګرام د پرانيستې په مراسمو کې پژواک خبري اژانس ته وويل، چې د ننګرهار پوهنتون د شرعياتو پوهنځي د فقهې او قانون په برخه کې د ماسټرۍ پروګرام د لوړو زده کړو وزارت په منظورۍ، نن په رسمي ډول پيل شو.

 ده وويل: ((زه ډېر خوشحاله يم چې ننګرهار پوهنتون په اکاډميکو برخو کې ګڼې لاسته راوړنې لري.))

 د هغه په وينا، په نږدې وختونو کې به د ژبو او ادبياتو په پوهنځي کې په پښتو ژبه کې د ماسټرۍ پروګرام پيل کړي.

 نوموړي دا هم وويل چې دوى وزارت ته وړانديز کړى، ترڅو د شرعياتو په برخه کې د دوکتورا پروګرام ورته جوړ او په لاره يې واچوي.

 د پوهنتون رييس وويل: ((د ننګرهار پوهنتون له کابله را وروسته يواځينى پوهنتون دى، چې د شرعياتو په برخه کې ١٨ ډاکټران لري.))

 د مومند په خبره، د ماسټرۍ لومړنى ټولګى چې ٢٠ تنه به وي، د هېواد له بېلابېلو پوهنتونونو څخه به استادان په کې جذب شي.

 د شرعياتو پوهنځي رييس پوهنوال سيد احمد فاطمي، پژواک خبري اژانس ته وويل چې د هېواد ټولو پوهنتونونو ته يې مکتبونه استولي، ترڅو هغه استادان چې ماسټري يې نه وي کړي او د فقهې او قانون په برخه کې غواړي ، چې ماسټري وکړي، ورته دې ور وپېژني.

 دى وايي، د شرعياتو په پوهنځي کې د ماسټرۍ يو بل پروګرام، چې د اسلامي تعليماتو په برخه کې دى، هم موجوده دى او برحاله محصلين روزي.

 فاطمي زياته کړه: ((زموږ استادان په کې درس وايي او د خوښۍ خبره خو دا ده، چې د دې پوهنتون محصلين په ګڼو پوهنتونونو کې استادان دي.))

 ياده دې وي، چې له دې وړاندې د ننګرهار پوهنتون د حقوقو او سياسي علومو په پوهنځي کې هم د ماسترۍ پروګرام پيل شوى و.