په بټي کوټ کې د امريکا يوه بې پيلوټه الوتکه غورځېدلې

جلال اباد ( پژواک ٣٠ ليندۍ ٩٢ ) : د ننګرهار په بټي کوټ ولسوالۍ کې دامريکايي  ځواکونو يوه بې پيلوټه الوتکه غورځېدلې ده.

په کابل کې د امريکا په مشرۍ دنړيوالو سوله ساتو ځواکونو (ايساف) مطبوعاتي دفتر  دليندۍ په ٣٠مه، پژواک خبري اژانس ته وويل ، چې پرون يې يوه بې پيلوټه الوتکه د افغانستان په ختځ کې غورځېدلې ده.

خو سرچينې په دې اړه نور معلومات نه دي ورکړي.

بلخوا په ختيځ کې سرچينې وايي ، چې دا الوتکه د ننګرهار ولايت په  بټي کوت ولسوالۍ غورځېدلې ده.

د بټي کوټ ولسوالۍ يوه اوسېدونکي محب الله پژواک اژانس ته وويل ، چې دا بې پيلوټه الوتکه پرون تر غرمې وروسته په دوه نيمو بجو ددې ولسوالۍ د کوډۍ په سيمه کې لوېدلې وه.

د هغه په وينا، د الوتکې تر غورځېدو ١٥ دقيقې وروسته وسله وال طالبان راغلل او په ډاټسن موټر کې يې ياده الوتکه له ځانه سره يوړله.

محب الله وويل ، چې بيا وروسته امريکايي ځواکونه راغلل او تر څو ساعتونو پورې په سيمه کې وو او بېرته ولاړل.

طالب وياند ذبيح الله مجاهد وايي، الوتکه تر غورځېدو وروسته ويجاړه شوې وه ، چې ددوى له خوا خوندي سيمې ته وړل شوې ده.

د يادونې ده ، چې تر دې مخکې هم په ننګرهار او ځينو نورو سيمو کې د امريکا بې پيلوټه الوتکې غورځېدلې دې.