په جلال اباد کې د نارنج جام کرکټ سیالیو کې دوه لوبې وشوې

جلال اباد ( پژواک ۹ مرغومی ۹۲ ) په ننګرهار ولایت کې د کرکټ د نارنج جام سیالیو په لړ کې د خوست او سرخرو ولسوالۍ لوبډلو خپلې لوبې وګټلې.

د شپږو لوبډلو په ګډون د نارنج جام کرکټ شل اووریزې سیالۍ د جلال اباد ښار اړونده د بهسودو پله د کرکټ په لوبغالي کې  د لوبه کرکټ کلب ( ایل سي سي) لخوا پیل شوې دي.

د ایل سي سي مشر ضراب شاه ظهیر د مرغومي په ۹مه، پژواک خبري اژانس ته وویل چې نن سهار په لومړي لوپه کې د خوست ولایت لوبډلې  د عرب لاین لوبډلې ته ماتې ورکړه.

هغه زیاته کړه چې د عرب لاین لوبډلې تر پچې ګټلو وروسته لومړۍ توپ وهنه وکړه او په ټاکل شویو ۲۰ اورونو کې د ۵ لوبغاړو په سوځیدو یې ۱۷۳ منډې جوړې کړې، عبید ۵۹ او ساجد خان ۶۷ منډې وکړې، د خوست له لوري خالد او ابراهیم دوه دوه لوبغاړي وسوځول.

د خوست لوبډلې یاد هدف په شلم اوور کې  ددریو لوبغاړو په سوځیدو ترلاسه او لوبه یې وګټله.

ظهیر وایي چې تر غرمې وروسته دویمه لوبه  د سرخرود او عمر کلب لوبډلو ترمنځ ترسره شوه، د چې د سرخرود په بریا پای ته ورسیده.

د عمر کلب لوبډلې په ۲۰ ا ورونو کې د ۵ لوبغاړو په سوځیدو ۱۵۷ منډې کړې وې، سلیمان دولتزي ۸۶ او صبور۴۳ منډې وکړې، عمران او انعام الله دوه دوه لوبغاړي وسوځول.

د سرخرود لوبډلې یاد هدف په اوولسو اورونو کې د یوه لوبغاړي  په سوځیدو ترلاسه او لوبه یې وګټله، عابد ۷۷ او ۴۶ منډې وکړې.