کابل (پژواک ١٠ مرغومى ٩٢): ولسمشر حامد کرزي د دفاع او کورنيو چارو وزيران ګومارلي، چې په کاپيسا کې د هغه زده کوونکي د وژنې عاملين د قانون منګولو ته وسپاري، چې د ملي اردو له يوې پوستې پر ډزو ووژل شو.
د کاپيسا د پوهنې رييس د وياند سيد مصطفى شېرزي په وينا، تواب الله د مدثر زوى، چې د کاپيسا ولايت د تګاب ولسوالۍ د “قدرت الله شهید” لېسې په اوم ټولګي کې زده کوونکى و، د مرغومى په ٨مه ووژل شو.
په هغې خبرپاڼه کې چې پژواک خبري اژانس ته را رسېدلي راغلي: “تواب الله د ملي اردو د يوه قوماندان له خوا چې د ملي اردو د ٥١ غونډ اړوندېږي، پر ډزو په بې رحمانه ډول وژل شوى دى.”
شېرزي وويل، چې تواب الله د رخصتۍ په ورځو کې د کتابونو اخيستو لپاره ښوونځي ته تللى و چې د دې پېښې قرباني شو.
د ده د معلوماتو له مخې، ولسمشر کرزي او د پوهنې وزير فاروق وردګ د ټيلېفون له لارې د تواب الله له کورنۍ سره اړيکه نيولې او د غمشريکۍ ترڅنګ يې عاملينو ته د سختې جزا غوښتنه کړې ده.
د کاپيسا د پوهنې رياست په خبرپاڼه کې د زياتو جزئياتو له ورکړې پرته راغلي: ” دا په داسې حال کې ده، چې د دې لېسې پخوانى امر قدرت الله هم ملي اردو د دغه افسر د کسانو له خوا پخوا په شهادت رسېدلى و.”
هغه زياته کړه، چې قدرت الله او تواب يو له بل سره د خپلوۍ کومه اړيکه نه درلوده.
د چارو ادارې او وزيرانو شورا په خبرپاڼه کې هم راغلي، چې د پوهنې وزير فاروق وردګ د وزيرانو شورا ه پرونۍ ناسته کې د تواب الله وژنې موضوع چې د ١٣٩٣ لمريز کال لپاره د درسي کتابونو تر اخيستلو وروسته له لېسې د کور پر لور روان و او د ملي اردو د پوستې پر ډزو ووژل شو، په ناسته کې مطرح او د قضيې د جدي څېړنې غوښتنه يې وکړه.
سرچينې ليکلي، چې ولسمشر کرزي په يوه ټيېيفوني اړيکه کې د قضيې جريان د تواب الله له پلار څخه اورېدلى، د کورنيو چارو او دفاع وزيران يې ګومارلي، چې د دې پېښې عاملين ډېر ژر ونيسي او د قانون منګولو ته يې وسپاري.
خو د کاپيسا امنيه قوماندان مل پاسوال خواجه فقيراحمد صديقي وايي، چې دا وژنه د شخصي دښمنۍ په سبب شوې او وژونکى يې لا هم نه دى پېژندل شوى.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن