ترافيکي پېښې څلورو تنو ته مرګ ژوبله واړوله

جلال اباد(پژواک،١٦مرغومى٩٢): د تورخم –جلال اباد پر لويه لار د دوو موټرو د ټکر له امله څلورو تنو ته مرګ ژوبله اوښتې ده.

د ننګرهار د ترافيکو مديرسمونوال اسدالله يوسفزي د مرغومي په ١٦مه پژواک خبري اژانس ته وويل ، چې نن شاوخوا يوولس بجې د تورخم-جلال اباد پر لويه لار د ثمرخېلو په سيمه کې د دوه کرولا ډوله موټرو د ټکر له امله يو تن وژل شوى اودرې نور ټپيان دي.

هغه زياته کړه ، چې ټکر د موټر چلوونکو د بې احتياطۍ له امله رامنځته شوى دى.

عيني شاهد عبدالغفار کامياب پژواک ته وويل ، چې په ټکر کې يې د دوو تنو جسدونه ليدلي، چې ژوند يې له لاسه ورکړى دى.

هغه زياته کړه، چې دواړه کرولا ډوله موټر په ډېرې تېزۍ سره روان  و، چې د بې احتياطۍ له امله يې ټکر رامنځته شو.

نوموړى وايي،دوه ټپيان يې هم ليدلي ، چې روغتيايي حالت يې نازک و.

د ننګرهار د ملکي روغتون يوه ډاکتر پژواک ته وويل، چې د پېښې له سيمې ورته دوه ټپيان وروړل شوي ، چې دا مهال تر درملنې لاندې دي.

ياده دې وي ، چې د تورخم-جلال اباد پر لويه لار هره ورځ ترافيکي پېښې رامنځته کيږي،چې تېر کال په دغه سړک سلګونو مسافرينو ته د ترافيکي پېښو له امله مرګ ژوبله اوښتې وه.