د ګاز ډبې چاودنې ديوې کورنۍ درې ماشومان مړه کړل

جلال اباد ( پژواک ٢٢ مرغومى ٩٢ ) : په جلال اباد ښار کې د ګاز ډبې دچاودنې له امله ديوې کورنۍ درې ماشومان مړه او والدين يې ټپيان شوي دي.

د ننګرهار د ملکي روغتون رييس ډاکټر همايون زهير د مرغومي په ٢٢مه، پژواک خبري اژانس ته وويل ، چې دا پېښه نن سهار وخته رامنځته شوې ده.

هغه زياته کړه، چې د جلال اباد ښار اړونده د کمپونو په سيمه کې په يوه کور کې دګازډبې چاودنه شوې، چې له امله يې تر لسو کلونو کم عمره درې ماشومان مړه شوي دي.

د ډاکټر زهير په وينا، د چاودنې له امله ددغو ماشومانو مور او پلار ټپيان شوي دي.

دى وايي، چې مړي او ټپيان روغتون ته راوړل شوي،خو د مړو شويو ماشومانو د مور روغتيايي حالت داندېښنې وړ دى.

د بصير په نامه د کمپونو يوه اوسېدونکي پژواک ته وويل، چې نن سهار وخته ناڅاپه يې د چاودنې غږ واورېد.

دى وايي ، کله چې دوى ياد کور ته ورغلل د ګاز ډبې د چاودنې له امله يې درې ماشومان مړه وو او دوه نور سخت ټپيان وو، چې دوى روغتون ته ولېـږدول.

ديوه بل خبر له مخې، نن سهار وخته د جلال اباد ښارد تلاشۍ په څلور لاري کې چاودنه شوې ده.

د ننګرهار دامنيه قوماندانۍ وياند سمونوال حضرت مشرقيوال پژواک اژانس ته وويل ، چې چاودنه د څلور لاري په منځ کې شوې، خو چاته يې زيان نه دى اړولى.

خو په سيمه کې ددوکانونو يوه څوکيدار پژواک ته وويل ، په چاودنه کې يو پوليس ټپي شوى و، چې روغتون ته لېږدول شوى دى.

وسله والو طالبانو تر اوسه په دې اړه څه نه دي ويلي.