په کاپيسا کې يوه نجلۍ ووژل شوه

محمودراقي (پژواک ١٩ سلواغه ٩٢): د کاپيسا ولايت د کوهستان په لومړۍ حصې ولسوالۍ کې يوه ځوانه نجلۍ پر ډزو ووژل شوه.

د کوهستان لومړۍ حصې ولسوالۍ امنيه قوماندان سمونوال محمدانور پژواک خبري اژانس ته وويل، چې دا ٢٢ کلنه نجلۍ تېره ورځ مازديګر د دې ولسوالۍ په قرسي سيمه کې د يوې پاکستانۍ تومانچې پر ډز وژل شوې ده.

د ده په خبره، پوليسو د نجلۍ ورور په دې وژنه کې د لاس درلودو په تور نيولى او د وژنې لامل به له څېړنو وروسته روښانه شي.

د سرچينې د معلوماتو له مخې، نيول شوي تن  ويلي، چې د تومانچې د پاکولو پر مهال ترې په تېروتنه ډز شوى او مرمۍ يې پر خور لګېدلې ده.

د شاکر په نوم د سيمې يوه اوسېدونکي په دې اړه وويل: ((دا نجلۍ يې د ورور له خوا وژل شوې، خو د وژنې لامل يې معلوم نه دى او زه  يې د کورنۍ په اړه زيات معلومات نه لرم.))

د يادونې ده، دا په روان کال کې  په دې ولسوالۍ کې ١١مه وژنه ده، چې د شخصي د ښمنيو او نورو مسايلو له امله رامنځته کېږي.