مزار شريف (پژواک د کب لومړۍ نېټه ۹۲): د اداري فساد په له منځه وړلو کې رسنۍ مهم رول لري.
دغه څرګندونې، نن د کب په لومړۍ نېټه په بلخ کې د اداري فساد په وړاندې د ادارې رييس شمس الله جاوېد، د دغې ادارې له خوا د رسنيو د ستاينې په يوه پروګرام وکړې.
ده زياته کړه، په افغان حکومت کې د اداري فساد په وړاندې مبارزه کې د نظام دننه غښتلې اراده نشته، خو د دغې ارادې د غښتلتيا په برخه کې رسنۍ خورا مهم رول لري.
په ولسي جرګه کې د بلخ د خلکو استازي حاجي عبدو، رسنۍ څلورمه قوه وبلله او زياته يې کړه: ((رسنۍ پر حکومت د څارنې ترڅنګ، حکومتي چارواکي خپلو مسووليتونو ته متوجه کوي او همدارنګه ولس له حکومت سره اشنا کوي.))
د هغه په وينا، رسنيو په افغانستان کې ښه وده کړې ده.
د بلخ پوهنتون د محصلينو د مرکز مشر سيد محمد يزدان پرست، د رسنيو لږ برخه په معيارونو برابره وبلله او زياته يې کړه، چې په دې ډول د اداري فساد په له منځه وړلو کې خپل رول لوبولی شي.
د هغه په وينا، د هېواد زياته برخه رسنۍ يا معياري نه دي او يا هم د حکومت له خوا اداره کېږي، چې د اداري فساد په وړاندې مبارزه کې يا اغېزمنې نه تمامېږي او يا هم ونډه نه اخلي.
په دغه پروګرام کې د اداري فساد په وړاندې د مبارزې رياست د بلخ څلورو سيمه ييزو رسنيو ته د اداري فساد په وړاندې د مبارزې په برخه کې د فعالې ونډې لپاره ستاينليکونه ورکړل.
