لښکرګاه ( پژواک ٩ کب ٩٢): د ولسمشرۍ کانديد ګل اغا شېرزي په هلمند کې يوې غونډې ته وويل ، چې که ولسمشر شي، د سولې د ټينګښت او د بيارغونې نورو پروژو ته د پاملرنې تر څنګ به د کجکي بند هرومرو ورغوي
دغه غونډه ، چې شاوخوا ٣٠٠٠ تنو په کې برخه لرله ، نن د هلمند په مرکز لښکرګاه کې جوړه شوه او له ګډونوالو يې شاوخوا ٣٠٠ تنه ښځې وې.
د ولسمشرۍ کانديد محمد شفيق ګل آغا شېرزي غونډې ته د وينا پر مهال وويل،چې د حکومت اوسنى د سولې پروګرام ناکام دى او که دى ولسمشر شو، نو د سولې لپاره به يوه جرګه ګۍ جوړه کړي، تر څو چې مرور خلک پخلا کړي او له جګړې لاس واخلي.
هغه وايي ، هڅه به وکړي،چې د هېواد ټولو خلکو ته د کار زمينه برابره کړي.
شېرزي وويل، چې په تېرو څو کلونو کې د هلمند د کجکي د برېښنا بند د درېيم توربين د نصب او بيا رغونې پروژې خبرونه خپريږي،خو که دى ولسمشر شي نو هرو مرو به دغه کار وکړي .
هغه وويل،چې که له بلې خوا د دې کار لپاره پيسې پيدا نه شي، نو په خپل لګښت به يې ترسره کړي.
د کجکې د برېښنا بند د درېيم توربين د نصبولو او بيارغولو لپاره شاوخوا اته کاله وړاندې د امريکا متحده ايالتونو له لوري تر درې سوه ميليونه زيات امريکايي ډالر ځانګړي شول، خو تر دې مهاله دا کار نه دى شوى.
شاوخوا يو کال مخکې د دې بند ځينو کارکوونکو ادعا کوله،چې دغه بند ته له ځانګړو شويو پيسو ١١٠ ميليونه ډالر د بهرنيانو په معاشونو لګول شوي دي.
په دغه بند کې دا مهال دوه توربينونه د ٣٢ مېګاواټه برېښنا توليد لري، چې د درېيم توربين په نصبولو سره به يې د توليد ظرفيت ٥١ مېګاواټو ته لوړ شي.
ګل اغا شېرزي په نننۍ غونډه کې وويل،چې که ولسمشر شي په هلمند کې به صنعتي پارکونه جوړ کړي او د بيا رغونې نورو پروژو ته به هم پاملرنه وکړي.
دى وايي ، چې که په ټاکنو کې بريالى شو، نو وړ کسان به پر دندو وګوماري او د ښځو حقونو ته به پاملرنه وکړي .
د غونډې يو ويناوال او د هلمند د ناوې ولسوالۍ قومي مشر عطاالله وويل، چې له شېرزي څخه ملاتړ کوي .
دده په وينا، له شيرزي د خلکو غوښتنه دا ده چې که بريالي شي،د سولې او امنيت ټينګښت او د بيا رغونې چارو ته ډېره پاملرنه وکړي.
وړمه ورځ د ولسمشرۍ بل کانديد اشرف غني احمدزي هم هلمند ته سفر کړى او يوې غونډې ته يې وينا وکړه چې شاوخوا ٦٠٠٠ تنو په کې برخه اخيستې وه.
