کابل(پژواک،٢٣کب ٩٢):پاکستاني چارواکي وايي، چې په دغه هېواد کې په دوه بېلا بيلو پېښو کې شاوخوا ٨٩ کسانو ته مرګ ژوبله اوښتې ده.
په خيبر پښتونخوا کې د پوليسو يوه تن چارواکي فيصل کامران رسنيو ته وويل، چې نن له غرمې وروسته د دغه ايالت اړوند پېښور ښار ته څېرمه د سربند سيمې په بهټه تل نومي سيمه کې د پوليسو مرکز ته نږدې ځانمرګى بريد شوى دى.
ده زياته کړه ، چې په دغه بريد کې پنځه تنه وژل شوي او ٣٥ نور ټپيان شوي دي.
دده په وينا په مړو او ټپيانو کې ښځې او ماشومان هم شامل دي.
فيصل وايي، چې د بريد دکوونکي موخه په سيمه کې د پوليسو موټر و.
دغه راز په پاکستان کې د جيو تلويزون ويلي چې، نن د کويټې ښار پر يونس سړک د ساينس کالج چوک ته نږدې په يوه چاودنه کې ١٠ تنه وژل شوي اوله ٣٠ زيات کسان ټپيان دي.
د يادو پيښو مسووليت تر دې دمه چا په غاړه نه دى اخيستى.
