په ښرنه ښار کې د پوهنتون د درېيو ودانيو د بنسټ ډبرې کېښودل شوې

ښرنه ( پژواک، ٢٥ ورى ٩٣ ) : د پکتيکا په مرکز ښرنې ښار کې ددغه ولايت د پوهنتون  د درېيو ودانيو د بنسټ ډبرې کېښودل شوې.

د پکتيکا والي محب الله صميم ددې پروژو د کار د پرانيستې پر مهال وويل ، چې د پکتيکا پوهنتون لپاره دوه تدريسي او يوه  اداري ودانۍ جوړېږي .

هغه زياته کړه ، چې يادې ودانۍ به ديوه کال په موده کې د ٥٥ ميليونه افغانيو په مالي لګښت جوړې شي .

نوموړي وويل، چې په دې وروستيو کې ددې ولايت امنيت ښه شوى، چې له امله يې د بيارغونې يو شمېر کارونه هم په پلان کې نيول شوي دي.

د پکتيکا د قومونو د يووالي شورا مشر ملامعصوم خيروي وويل، چې په هېواد کې شته ستونزې يواځې د زده کړو له لارې هوارېدلى شي.

هغه زياته کړه، چې د پوهنتون لپاره د ودانيو جوړېدو سره به ددې ولايت محصلينو ته دلوړو زده کړو لپاره ښه زمينه برابره شي.

د ځوانانو په استازيتوب ازاد خبريال عبيدالله سروضوال په پکتيکا کې د دا ډول علمي مرکز جوړېدل مهم ياد کړ او په دې برخه کې يې د سيمه ييزې ادارې هڅې وستايلې

ديوه بل خبر له مخې، د دې ولايت په مرکز ښرنه کې د پوهنې رياست اړوند ددريېم او شپږم خالي بستونو لپاره له ۲۳۴ تنو څخه دازاد رقابت ازموينه واخيستل شوه.

د پوهنې رياست تدريسي مرستيال ميراجان صحرايي پژواک اژانس ته  وويل ، چې ددغې ازموينې لپاره ۲۹۸ تنو نوم لکينه کړې وه، چې له ډلې يې ۲۳۴ تنه ازموينې ته حاضر شول.

صحرايي وايي، د يادو ازموينو دګډونوالو له ډلې  څخه به يې ۱۶۰ تنه د پوهنې رياست په چوکاټ کې د امريت، اونظارت په څانګوکې  په مرکز او ولسواليو کې پر دندو وګومارل شي.