غزني کې ٣ تنو ته مرګ ژوبله واوښته

غزني (پژواک ٤ غويى ٩٣): په غزني ښار کې د بېلابېلو پېښو په ترڅ کې درېيو تنو مرګ ژوبله اوښتې ده.

د دې ولايت د والي وياند شفيق ننګ، پژواک خبري اژانس ته وويل، چې نن ماخوستن په شاوخوا اتو بجو د غزني ښار اړوند په پښتون اباد سيمه کې وسله والو طالبانو پر دوو تنو بريد وکړ.

ده زياته کړه، په دې پېښه کې يو ملکي وګړى وژل شوى او بل تن چې پوليس و، ټپي شوى دى.

د غزني د ولايتي روغتون مشر بازمحمد همت وويل، چې دوى ته يو پوليس په ټپي حالت کې ور وړل شوى، چې روغتيايي حالت يې ښه دى.

په سيمه کې يو عيني شاهد نورالله وايي، چې دوه تنه چې پر موټرسايکل سپاره وه او مولونه يې وهلي وو، راغلل او پر يادو کسانو ډزې يې وکړې او وتښتېدل.

د غزني د والي وياند دغه راز زياتوي، چې نن ماښام د وسله والو مخالفينو له لوري دوه توغندي پر غزني ښار توغول شوي دي.

د هغه په خبره، يو توغندى د غزني ښار په منځ بزازۍ سيمه کې لګېدلى، چې له امله يې يو ملکي وګړى ټپي شوى دى.

نوموړى وايي، بل توغندي تلفات نه لرل.

Views: 0