اسعداباد(پژواک،٥غويى٩٣):د کونړ ولايت چارواکي وايي، چې پاکستاني پوځيانو يو ځل بيا پر دغه ولايت ١٨ توغنديي بريدونه کړي دي.
دا توغندي ددغه ولايت د دانګام ولسوالۍ په ځينو سيمو لګېدلي، چې چارواکي يې لرې واټن ويشتوونکي بولي.
دکونړولايت امنيه قوماندان مل پاسوال عبدالحبيب سيدخېل د غويي په ٥مه پژواک خبري اژانس ته وويل، چې له تېرې شپې راهسې دکونړولايت په سرحدي ولسوالۍ دانګام د پولې له هغې غاړې د پاکستاني پوځيانو له خوا د لرې واټن اتلس توغندي راوېشتل شوي ، چې خلکوته مالــي زيانــــونه اوښتي دي.
امنيه قوماندان وايي، چې دغه توغندي د دانګام ولسوالۍ په زاړه برول، کچلي او د شينکي پر سيمو لګېدلي دي.
نوموړي زياتوي، چې که نړيواله ټولنه او مرکزي دولت د دې بريدونومخه ونه نيسي ، نو د کونړ ولايت د سرحدي ولسواليو خـلک به لـه ډېروستونزوسره مخ شي.
افغان حکومت تل ددغو بريدونو غندنه کړې او د هغو د بندولو غوښتونکى شوى دى.
