د هلمند له سنګينه امريکايي سمندري ځواکونه ووتل

لښکرګاه (پژواک ۱۷غويى ۹۳): د هلمند امنيتي چارواکي وايي، چې د سنګين   له ولسوالۍ د امريکايي سمندري ځواکونو وروستۍ ډله هم ووته.

په هلمند کې د ۲۱۵ ميوند قول اردو له مطبوعاتي دفتره د غويي په ١٧مه پژواک ته په رالېږل شوې خبرپاڼه کې ويل شوي، چې د ايساف ځواکونو  په چوکاټ کې د امريکايي سمندري ځواکونو۴۰  کسيزه  ډله دوه ورځې مخکې له سنګين ولسوالۍ وتلې ده.

د خبرپاڼې په حواله، ياده ډله اوس په دغه ولايت کې د بهرنيو ځواکونو لويې اډې ښوراب ته لېږل شوې او په سنګين کې يې  پر ځاى امنيتي مسووليت د افغانستان د ملي اردو ځواکونو  له خوا پر مخ وړل کېږي.

سرچينه ويلي، په سنګين کې يادو امريکايي ځواکونو شتون يوازې فزيکي بڼه  درلوده او د امنيت چارې له وړاندې هم د افغان ځواکونو له خوا پرمخ  وړل کېدي.

په خپره  شوې خبرپاڼه کې دا هم ويل شوي، له  هغه وخته چې د امنيت د لېږد چارې پيل شوې افغان امنيتي ځواکونه له هېڅ  ډول ننګونو سره نه دي مخ  شوي.

بلخوا د هلمند امنيه قوماندان  پاسوال ارکانحرب عبدالقيوم  باقي زوى پژواک ته وويل، افغان امنيتي ځواکونه د دې جوګه دي، چې د امنيت  ساتلو چارې په سمه توګه ترسره  کړي.

د ده په وينا، له  سنګين څخه  د بهرنيانو په وتو سره  هېڅ ګواښ نه ويني  ځکه  د هلمند ولايت په ټولو ولسواليو کې افغان ځواکونه خپلواک عمليات کوي او له هغو  سيمو چې بهرني ځواکونه وتلي، امنيت يې ښه  شوى او د دولت د وسله والو خوځښتونه کم شوي دي.

په هلمند کې د امريکايي ځواکونو له پوځې اډې پژواک ته په رالېږل شوې خبرپاڼه کې ويل شوي، چې سرتېري يې د غويي په ١٥مه له يادې ولسوالۍ وتلي دي.

په خبرپاڼه کې ويل شوي، چې  تېر کال د سپټمبر په مياشت کې يې ٤٠ سرتېري په يادې ولسوالۍ کې مېشت شوي وو.

سرچينه وايي، چې په دې ولسوالۍ کې يې د خپل پوځي مرکز چارې افغان پوځيانو ته سپارلې دي.