د ننګرهار له زندان څخه ١٥٥ بنديان خوشي شول

جلال اباد ( پژواک ٣٠ ٩٣): د ننګرهار له محبس څخه  ١٥٥ تنه بنديان د ولسمشر د ١٦مې ګڼې ځانګړي فرمان له مخې خوشي شول.

د ننګرهار د محبس مدير سمونوال عبدالولي حصارک نن ( د غويي ٣٠مه ) پژواک خبري اژانس ته وويل چې په يادو ١٥٥ تنو کې يوه  نجلۍ او څلور ښځې هم شاملې دي.

ده وويل چې په دغو بنديانو کې ۱۳۰ تنه د سياسي او پاتې نور د جنايي جرمونو پر بنسټ بنديان شوي وو.

د سمونوال عبدالولي حصارک په خبره، د دغه فرمان له مخې د يو شمېر بنديانو د بند موده هم راکمه شوې ده.

له خوشې شويو بنديانو څخه يو تن مولوي نعمت الله پژواک خبري اژانس ته وويل چې دوه کاله وړاندې د ننګرهار په سرحدي سيمه کې له  وسلوالو مخالفينو سره د تړاو په تور نيول شوى و.

ده  له ولسمشر حامد کرزي مننه وکړه چې د يو شمېر بنديانو د خوشي کېدو لپاره يې ځانګړى فرمان صادر کړى دى.

ده وويل: (( که څه  هم زه يې د طالبانو په تور نيولى وم، خو زه طالب نه وم، که بيا يې هم راباندې ثبوت کړه زه همدلته يم بيا هم حاضر يم))